SUSPEK SA PAGPATAY SA CONSTRUCTION WORKER SA ISLA NG BORACAY ARESTADO NA

(Update) Nasa kamay na ng Boracay PNP ang suspek sa pagpatay sa isang lalaki na natagpuang naaagnas sa kanipaan sa Brgy. Manocmanoc, Isla Boracay umaga ng Miyerkules.

Ang suspek na si Glemer Escasulatan, 25-anyos ay nahuli sa Brgy Mataphaw, New Washington hating gabi ng Huwebes sa pamamagitan ng hot pursuit operation ng Boracay at New Washington PNP, at mga tanod ng Brgy. Manocmanoc.

Ayon kay PO1 Christian Ureta, imbestigador ng Boracay substation, ang bangkay ay kinilala ng pamilya na si Donie Manuel, 45-anyos, isang construction worker at tubong Sta. Fe, Romblon.

Batay umano sa testigo na si Sadam Nacionales, gabi umano ng Sabado nang magsumbong sa kanya ang pinsan na pinatay niya ang biktima at itinapon umano sa kanipaan at pagkatapos ay tumakas.

Sinabi ni PO1 Ureta na Byernes ng hapon ay nag-inuman pa umano ang suspek at ang biktima. Simula noon ay di na umano nasilayan pa ang biktima.

Nahaharap sa kasong murder ang nasabing suspek.| Darwin Tapayan, EFM Kalibo