Base sa report it Philippine Statistics Authority (PSA) iya ro kabilugan nga birth documents sa probinsya it Aklan hay nag-abot sa 14,177 ku 2017.Sa nahambae nga numero, 61 poryento hay narehistro sa tama nga tyempo; samtang 39 porsyento hay nag-agi sa late registration sa mga civil registry offices.
Suno sa PSA-Aklan, nagtaas ku 2017 it daywang porsyento ro birth registration sa probinsya kung ikumpara ku 2016 nga may 13,943.
Ro pinakamataas nga pagtaas sa pagrehistro hay nanotahan sa banwa it Ibajay nga may 28 porsyento (halin 1,091 asta 1,391), ginsundan it Nabas nga may 26 porsyento (623 asta 788), ag Madalag, 24 porsyento (halin 426 asta 530).
Sa isaea ka press release, ginhambae ni Provincial Statistics Officer Antonet Catubuan nga ro pagtaas it birth registration sa Aklan hay dahil sa free mobile registration program nga ginhiwat sa ngkaea-in ea-in nga mga munisipyo sa andang mga kabarangayan.
Ginpunto man nana nga tungod sa nasambit nga programa, ro mga tawo hay naedukar sa importansya it birth certificates ag hara hay makapabaskog sa civil registry system.
Samtang, ginaduso man ni Catubuan sa mga local civil registry offices sa Aklan nga pabaskughon nanda ro registration program indi eamang sa registration campaign kundi sa pag-edukar sa mga residente ag komunidad sa pagtama it mga depekto sa anda nga mga civil registry documents. - PIA Aklan
No comments:
Post a Comment