Mangingisda sa bayan ng Buruanga nawawala sa karagatan

photo c. PCG Buruanga

[Exclusive] ISANG MANGINGISDA ang pinaniniwalaang nawawala sa karagatang sakop ng bayan ng Buruanga simula pa araw ng Linggo.

Kinilala ang nasabing lalaki na si Panfilo Tandog, 52-anyos, residente ng Brgy. Katipunan, Buruanga.

Batay sa kanyang kapatid na si Jose Tandog umalis umano si Panfilo dakong alas-6:00 ng gabi araw ng Sabado sakay ng kanyang bangka para umano mangisda.

Nagtaka ang kanyang pamilya na lumipas na ang gabi ay hindi parin ito nakakauwi ng kanilang bahay.

Kinabukasan ay natagpuan nalang ng ibang mangingisda ang kanyang bangka sa gitna ng karagatan malapit sa baybayin ng Brgy. Katipunan, Buruanga nakataob na at wala nang tao.

Simula kahapon ay nag-search and rescue operation ang mga tauhan ng MDRRMO, Bantay Dagat at Philippine Coast Guard sa mga karagatang sakop ng Buruanga at Boracay subalit hindi parin ito natatagpuan.

Batay sa pamilya, nakasuot ng itim na jacket ang mangingisda, nakapantalon, maputi at may taas na 5'7".##

- Kasimanwang Darwin Tapayan, Energy FM Kalibo