SUSPEK SA PANANAGA SA ISANG CHINESE ENGINEER SA MADALAG NAARESTO NA

NAARESTO NA ng kapulisan ng Madalag ang suspek sa pananaga sa isang Chinese construction engineer sa Madalag Biyernes ng gabi.

Ayon kay PSInsp. Cyril Punzalan naaresto nila ang suspek sa Brgy. Alas-as sa nabanggit na bayan umaga ng Lunes.

Kinilala ang suspek na si Ramy Rufino y De Tomas, 27, driver sa konstruksyon sa Timbaban Hydro-Power Plant, residente ng Ma. Cristina sa parehong bayan.

Lumalabas sa imbestigasyon ng kapulisan na nagalit umano ang suspek nang hindi pirmahan ng banyaga na si Shi Ji Wu, 26, ang kanyang DTR.

Lasing umano ang biktima nang dumating sa kanilang barracks at rason ng biktima hindi niya pinirmahan ang DTR ng suspek dahil hindi ito pumasok ng aras na iyon.

Sa galit ng suspek tinaga niya ang Chinese na tinamaan sa kanyang balikat at dibdib. Malubha ang lagay ng biktima at naka-confine parin sa pribadong ospital sa Kalibo.

Nakakulong na ngayon ang suspek sa Madalag Police Station at nakatakdang sampahan ng kasong frustrated murder.##

- Kasimanwang Darwin Tapayan / Energy Fm 107.7 Kalibo