NAG-ABOT EON sa 60 ro kaso it tipdas sa bilog nga probinsiya it Akean as of March 4 makarong dag-on base sa rekord it Provincial Health Office (PHO) - Aklan.
Do banwang Malay hay nakalista it 22 nga kaso it tipdas ginasundan it Kalibo nga may 12 eon ka kaso ag Balete nga may an-om.
Owa pa it may mga nailista nga kaso it makamaeatay ngara nga sakit sa mga banwa it Altavas, Buruanga, Lezo, Madalag ag Makato.
Ginamonitor sigun it PHO ro mga lugar nga may mga kaso it tipdas para malikawan nga magtapon raya. Gin-ubrahan man nanda it mga separar nga lane ag kwarto ro mga pasyente sa mga ospital.
Dugan kara nagaapila ro PHO sa mga ginikanan nga pabakunahan ro mga inunga kontra sa makahaeawa nga sakit. Libre sigon ro bueong ngara sa mga health center.
Sa makaron owa paman it nailista nga namatay bangod sa tipdas iya sa Akean.##
No comments:
Post a Comment