Eaki balik kulungan matapos takawan ro sangka seaman sa Boracay

photo Malay PNP

BALIK-KULUNGAN ro sangka eaki sa Isla it Boracay matapos nga takawan ro sangka seaman sa anang boarding house sa Brgy. Manocmanoc kahapon it hapon.

Ginikilaea sa report it Malay PNP ro suspek nga si Christopher Lim y Castilllo, 19-anyos ag taga-Banaybanay, Malinao samtang ro biktima hay si Mark Steven Cuanico y Toriaga, taga-Tondog, Tangalan.

Nasayuran nga tinakaw it suspek ro laptop it biktima samtang nagapahuway imaw sa anang ginadayunan nga boarding house sa King Fishers Farm banda.

Pagkapan-o it biktima hay eagi man ra nga nagpatabang sa mga tawo ag nadakpan ro suspek. Nabawi sa suspek ro laptop.

Gin-aresto ro suspek ag temporaryo nga ginkulong sa lock-up cell it Malay PNP Station sa Boracay. Nasayuran nga kakaguwa eang nana ra sa Aklan Provincial Jail sa kaso man nga pagpanakaw.

Nakataeana nga pagapasakaan it nagakaigo nga kaso ro suspek.##

- Kasimanwang Darwin Tapayan, Energy FM Kalibo