2 BATA NAIULAT NA NAWAWALA SA BAYAN NG IBAJAY

Nanawagan ngayon si kasimanwang Nida Ramis, 56 anyos ng Brgy. Rizal, Ibajay matapos mawala ang kanyang apo at anak na pawang mga menor de edad.

Ang mga ito ay sina Niña Ramis, 7 year-old at pamangkin niyang si John Michael Escala, 11.

Ayon kay Kasimanwang Nida, huling nakita ng kanyang mga kapitbahay ang dalawa dakong alas-6:00 kagabi sa isang tindahan malapit sa kanilang bahay sa brgy. Rizal.

Simula noon ay hindi na nakita at umuwi ng bahay ang mga bata bagay na ikinababahala ng pamilya.

Photo © Ibajay PNP

Sinabi rin niya sa Energy FM Kalibo na nakipag-ugnayan at pinuntahan na nila ang mga kamag-anak at mga kakilala ng mga bata na pwede nilang puntahan pero negatibo umano.

Umaasa parin ang pamilya na babalik ang dalawa. Paliwanag ni Kasimanwang Nida bagaman napagsasabihan nila ang mga bata ay hindi naman umano nila ito sinasaktan.

Huling nakita ang batang lalaki na nakasuot ng puting tshirt at navy blue na short pants samantalang ang babae ay nakasuot ng medyo kupas na pink na tshirt at bulaklaking short.

Naireport narin ito sa pulisya at ipinakalat na ang impormasyon sa bayan at sa kampo ng pulisya sa probinsiya.

Kung may anumang impormasyon sa kinaroroonan o kalagayan ng mga bata magreport lamang sa pulisya, sa himpilang ito o sa pamilya sa 09121352545.

MOTOR BUMANGGA SA ISANG BAHAY SA BAYAN NG KALIBO

ulat ni Archie Hilario, Energy FM 107.7 Kalibo

Bumangga sa bahay na ito ang isang lasing na motorista sa Barangay Pook, Kalibo.

Sa kwento ng motorista nakainom ito kaya mabiliis ang kanyang pagpapatakbo sa motorsiklo.

Inakala umano nito na tuwid ang kalsada kaya hindi nito nailiko ang motor at bumangga ito sa isang bahay at nagtuloy-tuloy ito sa loob.

Bali ang haligi ng bahay bali rin ang daliri ng biktima. Maswerte naman at walang nasugatan sa mga natutulog sa loob.

Matapos ang pag-uusap sa opisina ng Kalibo PNP ay nagkaroon ng settlement ang may-ari ng bahay at ang motorista.

Ipapaayos na lamang daw ng lalaki ang nasirang bahay.

PNP MULING NAGPASIGURO NA HINDI MALALABAG ANG KARAPATANG PANTAO SA OPLAN TOKHANG REBOOT

Muling nagpasiguro ang kapulisan na hindi malalabag ang karapatang pantao sa kanilang Oplan Tokhang Reboot.

Ito ang binigyang-diin ni PSInsp. Honey Mae Ruiz, officer in charge ng Kalibo PNP, sa panayam ng Energy FM Kalibo.

Nilinaw niya ang ilang isyu sa drop boxes na inilalagay ng mga pulis sa mga barangay para sa pangangalap ng mga pangalan ng mga bagong 'drug personalities'.

Ani Ruiz, walang dapat ikabahala dahil ang mga pangalang makukuha nila ay dadaan parin ito sa mahaba at masinsinang proseso ng pagbabalida.

Ayon pa sa opisyal, papanatilihin kompedensyal ang mga listahang nakalap nila. Ang mga boxes anya ay lalagyan narin ng kandado at siya lamang ang magbubukas nito.

Ibinahagi narin umano niya ang numero ng chief of police sa mga barangay para pwede makapagtext ang iba ng impormasyon hinggil sa mga nasasangkot sa iligal na droga.

Simula nang mailunsad ito ay nakakalap na sila ng ilang mga pangalan na sinasalang na sa pagbabalida at pinapanatili naman umano nilang kompedensyal.

Sa kabila nito, aminado si Ruiz na posibleng maggamit ito ng iba sa pulitika, negosyo, o personal na away at dagdag trabaho rin sa mga kapulisan.

Gayunman nanawagan siya sa taumbayan ng kooperasyon at na maging 'open-minded' dahil anya para rin ito sa kapakanan ng lahat.

3,500 MGA TURISTA DARATING SA BORACAY BUKAS LULAN NG CRUISE SHIP

Inaasahang darating bukas sa isla ng Boracay ang nasa 3,500 mga turista lulan ng isang international luxury cruise ship. Sakay rin nito ang nasa 2000 crew.

Ito rin ang unang pagdaong ng MV Gentig “Dreams of Dream Cruises” sa isla sakay ang mga nasabing bilang ng mga turista na karamihan ay Chinese.

Ang cruise ship ay inaasahang dadaong dakong alas-7:30 ng umaga para sa isang tour sa buong isla at inaasahang aalis dakong alas-4:00 ng hapon pabalik sa China.

Ang mga turista ay sasalabungin ng Ati-atihan dance performance.

Ito na ang ika-siyam an cruise ship na dumaong sa Boracay ngayong taon at inaasahang walong iba ang bibisita sa isla bago magtapos ang 2017. (PNA)

PALENGKE SA NABAS NINAKAWAN; PHP20K HALAGA NG PANINDA NATANGAY

ulat ni Darwin Tapayan, Energy FM 107.7 Kalibo

Ninakawan ang isang pwesto sa Nabas Public Market ng di pa nakikilalang mga susek tangay ang Php20,000 halaga ng mga paninda.

Ayon sa report ng Nabas PNP, ang mga ninakaw ay ready to wear (RTW) sa pwesto na pagmamay-ari ni Odon Palanog, 46 anyos ng brgy. Solido, Nabas.

Salaysay umano ng biktima, dumating siya sa lugar kaninang umaga na nagkalat na ang ilang paninda niya. Nang usisain ay nanakawan umano siya ng iba-ibang RTW.

Nabatid na gawa lamang sa trapal ang kanyang pwesto at ayon sa pulis ay madilim umano ang lugar.

Ayon pa sa awtoridad, wala umanong lumalabas na testigo sa insidente; wala rin umanong close circuit television sa lugar.

Patuloy pang iniimbestigahan ng pulisya ang nasabing insidente.

MGA TRICYCLE DRIVER AT OPERATOR PABOR SA BAGONG TRAFFIC SCHEME SA KALIBO

Pabor ang Federation of Kalibo Tricycle’s Operators and Drivers Association Inc. (FOKTODAI) sa dryrun ng bagong traffic scheme sa kabiserang ito ng probinsiya.

Ayon kay federation president Johnny Damian, noon pa man ay ito na ang kanilang kagustuhan na maging maayos at malinis ang mga pangunahing kalsada sa Kalibo.

Umaasa umano ang pederasyon na hindi magiging ‘ningas kogon’ ang pagpapatupad ng panibagong traffic scheme. 

Nanawagan naman siya sa mga kasama niyang mga tricycle driver at mga operator na maging disiplinado at sumunod sa ipinapatupad na batas trapiko.

Mapapansin na ang mga pangunahing kalsada sa bayang ito ang maraming signages na ‘no parking’, ‘no entry’ at iba pa dahil sa dry run ng traffic scheme na nasa pangatlong linggo ngayon.

Matatandaan na sinabi ni Traffic and Transport Management Unit head Mary Gay Quimpo-Joel na magpapatuloy ang dryrun hanggang sa maisabatas na ito.

9-ANYOS NA BATA PATAY NANG MAKURYENTE SA BAYAN NG MAKATO

Patay ang isang 9-anyos na batang lalaki makaraang makuryente sa kanilang bahay sa brgy. Cayangwan, Makato.

Kinilala ang biktima na si Raffy Roldan jr., residente ng nasabing lugar.

Sa imbestigasyon ng Makato municipal police station, umakyat umano sa bubong ng bahay ang bata kung saan ito nakuryente.

Ayon sa pulisya, may nakalaylay na kuryente sa sim at maulan pa ng panahong iyon na nagmitsa nang pagkukuryente ng biktima.

Agad namang isinugod ng pamilya ang bata sa provincial hospital pero dineklara rin siyang dead on arrival.

67 ANYOS NA MOTORISTA SUGATAN NANG MAAKSIDENTE SA MABILO, KALIBO

ulat ni Archie Hilario, Energy FM 107.7 Kalibo

Sugatan ang 67-anyos na si Adresto Gomez matapos maaksidente sa motorsiklo sa Mabilo, Kalibo kagabi.

Sa inisyal na imbestigasyon papauwi na sa New Buswang, Kalibo ang biktima ngunit nawalan ito ng kontrol sa pakurbadang daan hanggang sa lumagpas ito sa kalsada hanggang sa matumba ang motorsiklo.

Patuloy na ginagamot sa Provincial Hospital ang biktima.

DALAWA SUGATAN MATAPOS PAGBABARILIN NG DI PA NAKIKILANG SUSPEK SA BORACAY

ulat ni Archie Hilario, Energy FM 107.7 Kalibo

Sugatan ang dalawang biktima matapos pagbabarilin ng di pa nakikilalang suspek sa So. Bolabog, brgy. Boracay kaninang umaga. 

Kinilala ang mga  biktima sa pangalang  Edlyn Catilla Padilla ,19-anyos na taga  Bacolod City, Roquito Pagayon Tumbagahan39, na taga-Ibajay, Aklan. 

Isinugod naman agad sa hospital ang mga biktima at stable na ang kalagayan ng mga ito. 

Lumalabas sa inisyal na imbestigasyon na agawan sa lupa ang motibo ng insidente.

Samantala nagpapatuloy naman ang imbestigayon ng pulisya sa insidenteng ito.

LASING NA KALIBO AUXILLARY POLICE (KAP) INIREKLAMO NG TRICYCLE DRIVER

ulat ni Archie Hilario, Energy FM 107.7 Kalibo

Nakatanggap ng tawag ang Kalibo PNP Station mula kay P02 Erick Jhon Delimos, humihingi raw ng police assistance ang gwardiya ng City Mall matapos umanong manita sa isang tricycle driver ang mga lasing na miyembro ng KAP. Bukod sa lasing raw hindi rin ito nakasuot ng uniporme.

Agad na rumesponde sa lugar sina SPO1 Dandy Martin, SPO1 Ulyssis Salazar at iba pang kasamahan. 

Pagdating sa lugar nakita nila doon ang nakasibilyang KAP na si Dennis Donato, 47-nyos na taga-Estancia Kalibo, at ang tricycle driver na si John John Noble. 

Inimbestigahan ng pulis ang tricycle driver, ayon sa pahayag nito sinita raw siya ng KAP at nagpakita raw ito ng ID. 

Kinuwestiyon nya ito kung bakit hindi naka-uniform, mamaya pa lumapit ang isa pang kasama ni Donato saka hinampas daw ang bubong ng tricycle. Nakilala lang ito sa pangalang Palomo na lasing din ng mga oras na yon.

Dinala ng pulisya ang mga ito sa Kalibo PNP station pero matapos maipamedical ang KAP nirelease din ito sa kustodiya ng PNP. 

Ayon sa kanila ipinasa nila ang kaso sa Municipal Economic Enterprise Development Office Transport And Traffic Management Divission ng Kalibo . 

Sila na raw ang bahalang umaksiyon at mag imbestiga sa ginawa ng Kalibo Auxillary Police dahil sila raw ang humahawak sa mga KAP.

MAYOR SA AKLAN NAGDRIVE NG AMBULANSIYA SA ISANG ATI NA MANGAGANAK

ulat ni Archie Hilario, Energy FM 107.7 Kalibo

Marami ang humanga sa kabutihang ginawa ni Mayor James Solanoy ng Nabas, Aklan sa kababayan nating ati (aeta) na humingi ng tulong sa kanya.

Manganganak na raw ito noong mga oras na 'yon kaya agad silang lumapit sa alkalde. 

Hindi na nagdalawang isip ang mayor at agad na pinsakay sa ambulansiya ng munisipyo at siya na mismo ang nagdrive at dinala sa malapit na pagamutan ang kababayan.

Habang nasa biyahe papuntang Kalibo ay tuluyan na ngang lumabas ang bata kaya nagdesisyon sila na idiritsu nalang ito sa Tangalan RHU. 

Ideneklarang patay ang sanggol. Nailigtas naman ang ina sa kapahamakan.

Sa kabila ng kalungkutan ay nagpapasalamat naman ang mag asawang ati na hindi sila tinanggihan ng mayor kahit na sa alanganing oras. 

Hindi raw nila akalain na si Mayor mismo ang magdala sa kanila sa hospital. 

Sana raw ay tularan ng matataas na opisyal at pulitiko ang kabutihang ipinakita sa kanila ni mayor.

MGA CONSTRUCTION SUPPLY PARA SA PABAHAY PROGRAM NG GOBYERNO NINANAKAW AT BINEBENTA SA JUNKSHOP

ulat ni Archie Hilario, Energy FM 107.7 Kalibo

Nadiskubre ng mga otoridad ang anomalyang nangyayari sa loob ng NHA Project sa brgy. Ochando, New Washington matapos mahuli ang dalawang babae na magbebenta sana ng mga frame ng bintana sa isang junk shop sa Kalibo.

Una nito sumakay ang dalawa sa isang tricycle na sinasabi nilang kasabwat rin sa pagnanakaw, mula sa sa construction site na inilagay nila sa sako ang mga frame saka ikinarga sa tricycle papuntang Kalibo.

Nang makarating sa Kalibo sarado umano ang junk shop pero nakaalis na ang naunang tricycle na sinakyan. Kaya naghanap sila ng tricycle na maghahatid patungo sa iba pang junk shop. 

Napadaan sa lugar ang isang Kalibo Auxillary Police na nakatricycle. Pumara ang dalawa at nagsabi na aarkilahin nila ang tricycle dahil ibebenta raw nila ang mga frame sa junk shop. 

Dito na nagtaka ang KAP dahil sa napansin nito na mukhang bago ang mga gamit kaya nagduda na nakaw ang mga ito.

Kaya sa halip sa junk shop , dinala ng KAP sa Kalibo PNP ang dalawa.

Sa pag- imbestiga ng PNP umamin ang dalawa na mula sa housing project ng gobyerno ang mga ibenebentang gamit.

Agad nagtungo sa New Washington ang PNP Kalibo kasama ang Energy fm newsteam at doon napag-alaman na doon pala nagtatrabaho ang mga asawa ng dalawang suspek.

Pahayag ng dalawang lalaki na hindi raw nila alam ang ginagawa ng kanilang mga asawa. 

Nagtataka raw sila kung bakit nailabas ang mga gamit sa kabila ng mahigpit na pagbabantay ng gwardiya at mga tanod.

Inimbitahan na Kalibo PNP ang dalawang constuction worker at tricycle driver na unang sinakyan ng mga suspek.

FISH VENDOR NA BABAE HINIPUAN NG MANYAKIS NA LALAKI

ulat ni Archie Hilario, Energy FM 107.7 Kalibo

Inaresto ng PNP ang isang lalaki matapos hipuan sa pribadong parti ng katawan ang isang fish vendor na babae sa isang bayan dito sa Aklan.

Sa ulat ng babae sa pulisya nag-alok umano ito ng isda sa suspek na katiwala ng isang Mayor sa negosyong construction kanilang bayan. 

Lumapit umano sa kanya ang suspek at nagsabi na susuriin umano nito kung talagang sariwa ang isda at para raw masigurado ay nagpaalam itong hawakan. Sumagot naman ang biktima na pwdeng-pwde. 

Ngunit nagulat ang tindera dahil sa halip na isda ang hawakan , hinipo ng suspek ang pribadong parti ng katawan ng biktima.

Sa gulat ng biktima agad na kinuha nito ang bangus sa timba at hinampas sa suspek.

Matapos ang insidente sinabihan pa umano ng suspek na kahit saan mang korte ay haharap siya dahil hindi siya pababayaan ng among mayor.

Matapos makulong ng isang araw sa PNP Station, nagkaroon ng settlement ang dalawa sa tulong ng alkalde.

Nakalaya na ang suspek at balik na sa pagbabantay ng negosyo ni Mayor.

MGA ‘LADY BOY’ HIHIGPITAN SA ISLA NG BORACAY AYON SA OPISYAL NG MALAY

Pinahihigpitan ngayon ng Sangguniang Bayan ng Malay ang pagmonitor sa mga mapagsamantala at manlolokong ‘lady boy’ o bading sa isla ng Boracay.

Sa sesyon ng Sanggunian, sinabi ni SB member Floribar Bautista na dapat ay epektibong maipatupad ang municipal ordinance no. 60-2002 na nagbabawal ng anumang uri ng prostitusyon sa isla.

Ayon kay Bautista, kailangang mapanatili ang magandang katayuan ng isla ng Boracay lalo na sa mga bisita at ipairal ang moralidad ng mga tao rito.

Matatandaan na kamakailan lamang ay inaresto ng pulisya ang isang 23-anyos na bading dahil sa panghahalay at tangkang pangingikil sa isang menor de edad na Koreano.

Kinilala ang bading na si Joel Dela Cruz at tubong Agusan del Sur pero kasalukuyang naninirahan sa Boracay para mag-alok ng ‘aliw’ sa mga dayuhan.

Nakatakda namang ipatawag sa pagdinig ng committee on peace and order ang hepe ng Boracay Tourist Assistance Center at mga opisyal ng tatlong barangay sa isla upang talakayin ang nasabing isyu.

DRUG STORE SA KALIBO NASALISIHAN; PHP8,000 NATANGAY

Nasalisihan ng hindi pa nakikilalang mga suspek ang isang drug store sa bayan ng Kalibo Huwebes ng tanghali.

Natangay ng mga suspek ang walong lata ng kilalang brand ng gatas na tinatayang aabot sa mahigit Php8,000.

Ayon kay PO2 Eric John De Lemos, imbestigador ng Kalibo PNP, hirap silang matukoy ang mga suspek dahil walang CCTV ang nasabing establisyemento.

Katwiran umano ng gwardiya, nananghalian siya sa mga oras na iyon kaya hindi niya napansin ang mga suspek bagaman una na niyang pinaghinalaan ang mga ito.

Nakita umano niya ang dalawang babae at dalawang lalaki na lumabas at sumakay ng tricycle na posibleng nagsalisi sa naturang establisyemento.

Nanawagan naman si De Lemos sa mga may-ari at namamahala sa mga establisyemento sa Kalibo na makipagtulungan sa kanila sa pagsolba ng mga ganitong uri ng kaso.

Isa umano rito ay ang pagsunod sa ipinapatupad na lokal na ordenansa ng munisipyo sa paglalagay ng CCTV sa kanilang mga establisyemento.

Sa kabila nito, sinabi ng police officer na tumaas ang kanilang crimr solution o mga naresolbang kaso nitong mga nakalipas na buwan.

SECURITY GUARD ARESTADO SA BUY BUST OPERATION SA BORACAY; 14 SACHETS NANG SHABU NAREKOBER

Nasabat ng mga kapulisan ang 14 sachet ng pinaghihinalaang shabu sa buy bust operation kagabi sa isla ng Boracay.

Ang operasyon ay ikinasa ng mga awtoridad laban sa suspek na kinilalang si Alex Garcera, 33 anyos, may-asawa, tubong Tapaz, Capiz at kasalukuyang nakatira sq brgy. Yapak sa nasabing isla.

Nabilhan ng poseour buyer ang isang sachet ng pinaghihinalaang shabu kapalit ng Php1000.

Ayon pa kay PCInsp. Frenzy Andrade, hepe ng Provincial Drug Enforcement Unit, nasabat rin sa kanyang posisyon at kontrol ang 13 sachet ng parehong sangkap at isang 9mm calibre ng baril.

Ang suspek ay isang newly identified drug personality ng mga kapulisan.

Todo tanggi naman sa panayam ng Energy FM Kalibo ang suspek at pinalalabas na "planted" lamang ang nangyari.

Nakakulong na ngayon sa Kalibo PNP station ang suspek habang inihahanda ang kasong isasampa laban sa kanya.

Posibleng maharap ang suspek sa mga kasong paglabag sa Comprehensive Dangerous Drugs Act at illegal possession of firearm.

Ang operasyon ay ikinasa sa brgy. Yapak sa isang hotel kung saan nagtratrabaho ang suspek.

Ikinasa ito ng pinagsamang pwersa ng mga tauhan ng PDEU, PDEA, Provinciall Intelligence Branch at Boracay at Malay PNP.

PNP MAY PAALALA SA MGA KABATAANG BABAE NA GINAGABI NG PAG-UWI

photo (c) Numancia PNP

Nanawagan ang pulisya sa mga kabataang babae na huwag magpapagabi at umuwing mag-isa. Sinabi rin ng awtoridad na kung maaari ay magpasundo sa mga magulang o sa ibang mapagkakatiwalaan.

Ito ang sinabi ni PO2 Jemilla Bergalino ng Women and Children Protection Desk ng Numancia PNP sa panayam ng Energy FM Kalibo.

Ang pahayag na ito ng pulis ay kasunod ng insidente ng tangkang panggahasa ng isang 23 anyos na lalaki sa isang 16 anyos na dalaga sa brgy. Laguinbanwa West Linggo ng gabi.

Matatandaan na mag-isang pauwi noon ang dalaga mula sa kanyang kamag-aral at pauwi na sa kanilang bahay dakong alas-7:00 ng gabi nang bigla siyang hinila ng suspek at tinangkang abusuhan.

Maswerteng nakapanlaban at nakahulagpos ang biktima sa suspek at nakahingi ng tulong bagay na naaresto ang nasabing lalaki at nasampahan ng kaukulang kaso.

Nanawagan siya sa mga magulang na kung maaari ay sunduin ang kanilang mga anak kapag malayo pa at walang kasama kapag gabi na.

Hinikayat rin niya ang taumbayan lalo na ang mga biktima ng kaparehong kaso na huwag mahiya at magreport agad sa mga kapulisan.

Tuloy-tuloy naman ang ginagawang kampanya ng pulisya ng pagbibigay impornasyon sa komunidad kaugnay ng Republic Act No. 8353 o ang Anti-Rape Law of 1997.

23 ANYOS NA LALAKI NA NAGTANGKANG GAHASAIN ANG 16 ANYOS NA DALAGA, SINAMPAHAN NA NG KASO

Sinampahan na ng kaso ang 23 anyos na lalaki na nagtangkang gahasain ang isang 16 anyos na dalaga sa Laguinbanwa West, Numancia.

Nahaharap sa kasong attempted rape ang suspek na si Jhonel Olog, tubong brgy. Ortega, Libacao.

Ayon kay PO2 Jemilla Bergalino, imbestigador ng Women and Children Protection Desk ng Numancia PNP, positibo umanong kinilala ng biktima ang suspek.

Sa imbestigasyon ng pulisya, naglalakad ang biktima pauwi na sa kanilang bahay nang madaanan siya ng suspek at kinaladkad sa madamo at madilim na bahagi.

Tinangka umanong gahasain ng lalaki ang biktima Linggo ng gabi pero nakapanlaban ito, nakahulagpos at nakahingi ng tulong sa mga dumaraang motorista.

Nakilala naman ng mga testigo ang suspek matapos itong sumakay sa iniwang motorsiklo malapit sa pinangyarihan ng insidente.

Naaresto ang suspek sa ginawang hot pursuit operation ng pulisya pero todo tanggi ito sa reklamo sa kanya.

Nakakulong ngayon sa Aklan Rehabilitation Center ang suspek. Aabot sa Php200,000 ang pyansa para sa kanyang pansamantalng kalayaan.

DATE SA KALIBO NAUWI SA PANANAKSAK MATAPOS TRIPINGAN NG MGA MENOR DE EDAD

Inimbitahan ng mga kapulisan ang grupo ng mga menor de edad na ito matapos masangkot sa pananaksak sa isang 20 anyos na lalaki sa Roxas avenue kagabi.

Nakilala ang biktima na si Rodjie Dela Cruz ng Calimbajan, Makato. Nagdadate siya at ang kanyang nobya nang tripingan siya ng mga batang ito na pawang mga taga-Oyotorong, Kalibo.

Positibo namang itinuro nang kanyang mga kasama ang isang 15 anyos na siyang responsable sa pagsaksak sa biktima gamit ang kutsilyo.

Arestado rin ang kasama niyang 19 anyos na nagpakilalang si Tobby Villanueva.

Dinala sa Social Welfare and Development Office ng munisipyo ang 15 anyos na bata  samantalang kulong naman sa Kalibo PNP station ang 19 anyos na suspek para sa kaukulang disposisyon.

SEKYU PATAY NANG BUMANGGA ANG MOTORSIKLO SA STOCKPILE SA BRGY. NAILE, IBAJAY

Patay ang isang 24-anyos na sekyu matapos bumangga ang sinasakyang motorsiklo sa stockpile sa brgy. Naile, Ibajay Sabado ng gabi.

Kinilala ng pulisya ang biktima na si Jesther Tagle y Florenso, residente ng Sta. Cruz, Ibajay at nagtratrabaho bilang sekyu sa isla ng Boracay.

Ayon kay PO1 George Regalado, imbestigador ng Ibajay PNP, bumangga sa stockpile sa gilid ng kalsada ang motorsiklo ng biktima.

Paliwanag ni Regalado, medyo madilim ang lugar at kasalukuyang ginagawa ang drainage sa gilid ng kalsada. Mabilis rin umano ang patakbo ng biktima.

Tumilapon umano ang biktima ilang metro mula sa kanyang motorsiklo at sumubsob sa kalsada.

Pinagtulungan naman ng mga opisyal ng barangay at ilang residente ang biktima at isinugod sa district ospital sa Ibajay pero dineklara rin itong dead on arrival.

Nabatid na papunta sana sa brgy. Monlaque, Ibajay ang biktima sa kanyang livein partner dakong alas-9:00 ng gabi nang maganap ang insidente.

ALE NASALISIHAN SA IBAJAY PUBLIC MARKET; MAGKAKAPATID NA MGA SUSPEK ARESTADO

photo (c) The Owner

Nasalisihan ang isang tindera ng isda sa Ibajay Public Market Martes ng umaga samantalang naaresto naman agad ang dalawang suspek.

Nakilala ang biktima na si Divina Soguilon, 54 anyos ng brgy. Bugtong-bato, sa nasabing bayan.

Ayon kay PO1 George Regalado, imbestigador ng Ibajay PNP, abala umano ang tindera sa pakikipag-usap sa babaeng suspek nang siya ay salisihan ng kasamang lalaking suspek.

Nakita umano niya sa kanyang pwesto ang pagtangay ng lalaking suspek sa kanyang shoulder bag.

Agad humingi ng tulong sa mga auxiliary police ang biktima at na nahuli ang lalaki maging ang kasama niyang babae.

Narekober sa lalaki ang itim na bag na naglalaman ng mahigit Php18,000.

Kinilala ang mga suspek na sina Mark Anthony Rosales, 27 anyos, at kapatid umano niyang si Ruby Rosales, 35, pawang mga residente ng Tondo, Manila.

Sinabi ni Regalado, inaalam na nila kung may iba pang kasama ang mga ito at kung may iba na na nabiktima ang mga ito dito sa probinsiya.

Ayon sa imbestigador nakita umano nila sa ticket na may ginamit silang sasakyan na ZAB-268 na posible anyang ginagamit nilang service vehicle.

Sa ngayon nakakulong na ang dalawa sa karsel ng Ibajay PNP station at nakatakdang sampahan ng kasong theft.

MISS WORLD PHILIPPINES 2017 DUMAYO SA AKLAN

Ulat ni Kasimanwang Joefel P. Magpusao, Energy FM 107.7 Kalibo

Nagkaroon ng pagkakataon ang Energy FM Kalibo na masilayan ang kagandahan ng tatlumpu't limang kandidata na magtatagisan para sa korona ng Miss World Philippines 2017 na gaganapin sa Mall of Asia Arena, September 3, 2017.

Alas 10 na ng gabi ng dumating ang mga kandidata sa Caticlan, Malay, Aklan para sa press conference na inorganisa ni Councilor Juris B. Sucro.

Pagbaba ng mga kandidata sa coaster na sinakyan nila mula Kalibo ay sinalubong sila ng pinagmamalaki ng Aklan na ati tribe na sumasayaw sa saliw ng tunog ng drum and lyre na nagmistulang Ati-atihan festival.

Isa-isang nagpakilala ang mga kandidata mula sa iba't-ibang sulok ng Pilipinas at isa sa mga ito ang nagpahayag ng kanyang kagalakan at muli syang nakauwi sa Probinsyang sinilanagan.

Si Jona Sweett candidate number 6 ay tubong Aklan. Pinanganak sa bayan ng Libacao at nagtapos ng kolehiyo sa Garcia College of Technology sa bayan ng Kalibo kaya't hindi maitanggi na sya ang naging center of attraction ng lokal press.

Matapos ang maikling oras na pakikipag-usap sa member ng lokal media ay agad nagtungo ang mga kandidata sa Isla ng Boracay. Mananatili sila doon hanggang 24 of August para sa ilang event.

Maliban sa title na Miss World Philippines 2017, tatlong iba pang title ang maaaring maiuwi ng papalaring kandidata. Miss Hispano Amerikana Filipino 2017, Miss Multinational 2017 at Miss Eco Tourism 2017. Magkakaroon din ng dalawang runner up sa titulo ng Miss World Philippines 2017.

SA ISLA NG BORACAY, 19 ANYOS NA LALAKI NAGBIGTI, PATAY

Patay ang isang 19 anyos na lalaki sa brgy. Balabag sa isla ng Boracay matapos itong magbigti sa loob ng sariling kuwarto kagabi.

Kinilala ng Boracay Tourist Assistance Center ang biktima na si Norman Broncano alyas “Boboy”, residente ng nasabing barangay.

photo (c) Manilyn Broncano f

Una rito, nagtaka umano ang ina matapos ilang beses siyang nagtatawag at kumakatok sa kuwarto ng anak para anyayahang kumain pero hindi ito sumasagot.

Dito pwersahan niyang sinira ang pinto ng kuwarto at tumamabad sa kanya ang malamig nang bangkay ng anak na nakabigi gamit ang electrical cord. 

Dinala pa nila ito sa isang klinika pero deneklara ring dead on arrival.

Ayon kay PO2 Marvin Garino, dakong alas-3:00 ng madaling araw kahapon nang umuwi ang biktima na nakainom at nakasagutan ang ama sa kanilang bahay.

Bago pumasok sa kuwarto ay nagsabi pa umano ito sa nakababatang kapatid na babae na “manami magpakamatay” at hindi na muling narinig at lumabas pa ng kuwarto.

Sinabi pa ni Garino na ganito rin ang binitiwang salita ng biktima sa kanyang mga barkada sa kanilang inuman bago umuwi ng madaling araw na iyon.

Wala namang nakikitang iba pang motibo ang imbestigador sa nasabing insidente. Wala rin umanong foul play sa insidente.

32 ANYOS NA LALAKI ARESTADO SA PAGNANAKAW NG MGA ALIMANGO

Arestado ang isang 32-anyos na lalaki matapos maaktuhang nagnakaw ng kalahating sako ng mga alimango at isang lambat sa brgy. Linayasan, Altavas kagabi.

Kinilala ng pulisya ang suspek na si Azor dela Cruz, residente ng brgy. Ginictan sa nasabing bayan.

Ayon kay SPO1 Jose Freginer Decio, imbestigador ng Altavas PNP, naaktuhan umano ng may-ari ng fishpond ang suspek kasama ang dalawang hindi pa nakikilalang mga suspek na nagnanakaw.

Salaysay ng biktima na si Nonie De Jesus, 43 anyos ng brgy. Linayasan, matapos maaktuhan ang tatlo ay hinabol niya ang mga ito at nahuli ang isa saka humingi ng tulong sa pulisya.

Nakuha sa suspek ang mga ninakaw na kalahating sako ng alimango at lambat na tinatayang nagkakahalaga ng Php20,000. Maliban rito, narekober din sa kanya ang dalawang itak at isang improvised hook.

Nakakulong na ngayon sa Altavas PNP ang suspek na ayon sa imbestigador ay nakatakdang sampagan ng kasong qualified theft.

PULIS BINUGBOG NG 2 KATAO SA BAYAN NG ALTAVAS

ulat ni Archie Hilario, Energy FM 107.7 Kalibo

Binugbog at tinangkang saksakin pa ng dalawang suspek ang pulis na si P02 Junnard Gervacio, 30 anyos na residente ng brgy. Lumaynay, Altavas, Aklan alas-onse ng umaga.

Bumibili lang raw ng pagkain ang nakasibilyang pulis na kalong-kalong pa ang 2-year old na anak sa Altavas public market. Sinadya umanong tapakan ng lasing na suspek na si Rene Ismael y Quadrante ang paa ng pulis.

Sinabihan ng pulis ang naunang suspek kung bakit siya tinapakan ngunit sa halip na humingi ng pasensiya ay nagalit pa ito saka pinagsusuntok ang biktima.

Maya-maya dumating raw ang isa pang suspek na kinilala sa pangalang Agusto De Pedro y Deci, 30 anyos na taga-Cabugao, Altavas at may bitbit itong kotsilyo at akmang sasksakin ang biktima.

Dito na bumunot ng baril ang biktima saka humingi ng tulong sa kapwa pulis.

Naaresto na ang dalawang suspek at nakulong ang mga ito sa Altavas PNP Station.

BARBERO, HULI SA PAGTUTULAK NG DROGA SA BAYAN NG IBAJAY

Arestado ang isang 39 anyos na barbero sa pagtutulak sa iligal na droga sa brgy. San Isidro, Ibajay madaling araw.

Kinilala ang suspek na si Aldwin Andrade, residente ng nasabing lugar.

Naaresto siya sa kanyang residensya matapos mabilhan ng isang sachet ng pinaghihinalaang shabu kapalit ng Php500 buybust money.

Nakuha rin sa kanyang posisyon at kontrol ang tatlo pang sachet ng parehong sangkap.

Ayon kay PCInsp. Frenzy Andrade, hepe ng Provincial Drug Enforcement Unit, ang suspek ay matagal nang minomonitor bago paman ito nagsurender sa pagsisimula ng Oplan Tokhang.

Pahayag pa ni CInsp. Andrade, bagaman sumuko siya ay bumalik rin ito sa pagtutulak ng droga.

Sinabi pa ng hepe na nag-ooperate ito sa bayan ng Ibajay at may pinagkukunan ng suplay dito lang sa probinsiya.

Ang operasyon ay ikinasa ng pinagsamang pwersa ng PDEU, Ibajay PNP, Philippine Drug Enforcement Agency, Aklan Public Safety Company, at 12IB TIU MIG6.

Ang nasabing suspek ay pansamantalang nakakulong sa Kalibo PNP station at nakatakdang sampahan ng kasong paglabag sa RA 9165.

VISAYAS NANANATILING LIGTAS SA BIRD FLU OUTBREAK

ulat ni Kasimanwang Joefel P. Magpusao, Energy FM 107.7 Kalibo

Sa panayam ng Energy FM Kalibo kay Atty. Hansel O. Didulo, Assistant Secretary for the Visayas ng Department of Agriculture, siniguro nito na ligtas kainin ang ano mang poultry products sa Visayas.

Mayroon umanong protocol na sinusunod ang Department of Agriculture (DA) kung kayat hindi agad nila inanunsyo ng mapag-alamang nagkakasakit ang mga manok noon pang buwan ng Abril. Kailangang maging epidemic bago ito ianunsyo. 

Million dollar industry ang poultry farming kayat kailangan din umanong proteksyonan ang mga stakeholders at upang hindi mag dulot ng panic sa consumers.

Tuloy-tuloy ang pagmomonitor sa shipment ban ng nasabing produkto. Bumuo ng task force si ASEC Didulo dito sa Region 6 na tututok sa paghuli ng mga pumupuslit na dealer. 

Ang task force ay binubuo ng survilance, public information, proper dessimination of information at Animal Movement Control Team na syang nakahuli sa mga balut galing Batangas na ibabagsak sana dito sa Aklan.

Nilinaw din ni ASEC Didulo na ang virus galing sa manok at iba pang poultry product at hindi makakahawa sa tao.

Limang laboratory na umano ang nagkumperma sa nasabing virus. Alam na din ng departamento kung saang farm ito nagmula. Dagdag pa ni ASEC Didulo na misinformation ang mga kumakalat na balitang nagmula ang virus sa migratory birds at smuggled peking ducks mula China.

Dito sa Region 6 ay wala pa umanong problema sa supply at demand ng produkto pero kapag ito ay nagtagal tiyak kukulangin tayo sa supply lalo pa't papasok na ang Christmas season.

MAG-AMA NA NANGTRIP, NANUNTOK SA LABAS NG BAR NADISGRASYA SA MOTORSIKLO

ulat ni Archie Hilario, Energy FM 107.7 Kalibo

photo © Aklan Response Team Art

Sugatan ang mag-ama matapos bumangga sa sinusundang tricycle sa Pook, Kalibo alas-8:55 ng gabi.

Sa imbestigasyon ng PNP, sinuntok umano ni Jerick Meren, 20-anyos na taga-Guinbaliwan, New Washington ang biktimang si Pablo Retubis, 39-anyos na residente rin ng Barangay Pook Kalibo.

Nakatayo raw sa labas ng Starlight Bar si Retubis nang biglang pinagsusuntok ng suspek. 

Matapos ang panununtok agad itong sumakay sa matorsiklo na menamaneho ng kanyang tatay na si Joel at may kapatid na si Jenard na agad nilang tinakasan ang sinuntok na biktima.

Sa pagmamadali at sa bilis ng pagpapatakbo sa motorsiklo bumangga ito sa sinusundang tricycle malapit sa Kalibo Airport.

Natumba ang motorsiklo kaya agad na nahuli ng rumespondeng pulis ang suspek.

Nakakulong na si Jerick Meren sa Kalibo PNP Station sa ngayon. Nasa kustodiya na rin ng PNP ang motorsiklo nito.

BAGUHAN SA FACEBOOK, NANAY NAGPADALA NG P50K SA NAGPAKILALANG KAPAMILYA

ulat ni Archie Hilario, Energy FM 107.7 Kalibo

Dumulog sa isang PNP Station ang nanay na ito matapos na mabiktima ng scammer sa facebook. 

Nagpakilala umanong kaanak ang suspek at ikinuwento sa biktima na nangangailangan raw ng P50,000.00 ang anak nito na nasa Amerika para ayusin ang problema sa US Embassy. 

Noong araw din na yon nakumbinse ang biktima at nagpadala nga ito ng nabanggit na halaga. Matapos ang transaksiyon hindi na raw sumasagot ang suspek sa mga tawag. 

Kaya tinawagan na ng biktima ang anak nito na sinsabing may problema sa embassy at doon na nalaman na pekeng account sa facebook pala ang ginamit ng scammer, ginaya lamang nito ang profile picture ng kanilang kaanak.

Nag-paalala ang pulisya na mag-ingat at gabayan ang mga baguhan sa social media. Huwag aga basta basta magpadala ng pera sa mga nagpapakilalang kapamilya gamit ang social media.

67 ANYOS NA BABAE NABUNDOL NG MOTORSIKLO SA BAYAN NG MALINAO, PATAY

Patay ang isang 67-anyos na babae makaraang mabundol ng motorsiko sa brgy. Rosario, Malinao.

Kinilala ng Malinao PNP ang biktima na si Emelda Retilba, residente ng nasabing barangay.

Ayon kay SPO2 James Villaruel, imbestigador ng kaso, tatawid na sana ang biktima sa kalsada pauwi ng kanilang bahay nang mabundol siya ng papalapit na motorsiklo.

Tumilapon ang biktima sa kalsada at nagtamo ng malubhang sugat sa ulo.

Mabilis namang umalis sa lugar ang driver sakay ng motorsiklo at kalaunan ay sumuko sa punong barangay ng Bulabod, Malinao.

Kinilala ang driver na si Michael Imaculata, 34 anyos, residente ng brgy. Bulabod na ngayon ay nasa pangangalaga na ng pulisya.

Bagaman naisugod at naconfine pa sa pribadong ospital sa bayan ng Kalibo ang biktima ay binawian rin ito ng buhay.

Ayon sa imbestigador maulanan ang panahon kahapon nang maganap ang insidente dagdag pa niya, mabagal maglakad ang biktima dahil sa stroke.

Posible namang maharap sa kasong Reckless Imprudence Resulting to Homicide ang nasabing suspek.

23 ANYOS NA LALAKI ARESTADO MATAPOS INIREKLAMO NG PANGGAGAHASA SA ISANG MENOR DE EDAD

Arestado ang isang 23-anyos na lalaki makaraang ireklamo ng panggagahasa sa isang menor de edad.

Sa mga impormasyong nakalap ng news team, naglalakad umano ang 16-anyos na biktima sa isang pribadong kalsada nang abusuhan siya ng suspek.

Nabatid na sakay ng motorsiklo ang suspek nang madaanan niya ang dalaga, bumaba at pwersahang inabusuhang sekswal.

Maswerte nakahulagpos ang dalaga matapos manlaban sa suspek at nakahingi ng tulong sa mga dumaraang motorista at mga residente.

Nakilala naman ng mga testigo ang susek na kabarangay lang ng biktima at sa follow-up investigation ng pulisya ay naaresto ang suspek.

Mariin namang itinatanggi ng suspek ang nangyaring insidente na nabatid nasa impluwensya ng nakalalasing na inumin.

Natruma naman ang biktima at nagtamo ng mga sugat sa kamay hita at sa bibig.

Patuloy pang iniimbestigahan ng Women and Children Protection Desk ng PNP ang pangyayari.

BAKLA ARESTADO SA PANG-AABUSO SA MENOR DE EDAD NA KOREANO SA ISLA NG BORACAY

Arestado ang isang 23-anyos na bakla makaraang halayin ang isang menor de edad na Koreano sa isla ng Boracay.

Kinilala ang bading na si Joel Dela Cruz, tubong Agusa del Sur at kasalukuyang nakatira sa station 3, brgy. Manocmanoc sa nasabing isla.

Ayon kay PO2 Emely Roldan, imbestigador ng Women and Children Protection Desk ng Boracay PNP, naganap ang insidente sa tinutuluyang boarding house ng suspek dakong alas-10:00 ng gabi.

Pahayag ng imbestigador inimbitithan umano ng suspek ang biktima na nakasalubong niya sa beach na pumunta sa isang hotel kung saan umano siya nagtratrabaho bilang therapist.

Sumama naman ang bata sa bading na hindi inaasahang dadalhin siya sa boarding house sa kanyang kuwarto at doon ay sekswal na hinalay. 

Inihatid aman umano ng bading ang Koreano sa kanyang mga magulang at humingi ng 100 dollar. Ayon kay Roldan, nakumbense ng suspek ang ama ng biktima na magbigay ng pera pero bigla umanong tumakbo ang suspek nang makita ang isang gwardiya na papalapit.

Naaresto ng pulisya ang suspek sa kanyang boardinghouse at pansamantalang ikinulong sa Boracay Tourist Assistance Center (Btac).

Ayon kay Roldan, hindi na nagpursigi ang pamilya na sampahan ng kaso ang bading dahil tatlong araw lamang umano ang kanilang bakasyon sa isla.

‘OPLAN HAWAN’ SA FRONT BEACH SA ISLA NG BORACAY MULING UMARANGKADA

ulat ni Darwin Tapayan, Energy FM 107.7 Kalibo

photo (c) LGU Malay

Umaarangkada ngayon sa isla ng Boracay ang “Oplan Hawan” clearing operation laban sa mga illegal vendors, commissioners, at mga illegal structures sa front beach.

Ayon kay PSInsp. Mark Anthony Gesulga, hepe ng Boracay Tourist Assistance Center, ang tuluy-tuloy na operasyon ay para mapanatili ang magandang imahe ng world-known tourist destination sa mga turista.

Paliwanag niya, ang aksyon ay kasunod ng ilang reklamo ng ilang mga turista laban sa mga commissioner na hindi sumisipot sa mga itinakdang oras sa mga binayarang aktibidad.

Sinisira rin umano nila ang mga iligal na istraktura na humaharang sa mga daanan at kinukumpiska ang mga paninda ng mga ambulant vendor para walang maging sagabal sa mga turista.

Pinasiguro naman niya na tuluy-tuloy ang gagawin nilang random operation at profiling sa mga mahuhuling lumalabag para sa mas mabigat na multa kapag muling nahuli.

Ang task force ay binubuo ng pulisya, lokal na pamahalaan ng Malay, army, coastguard, auxialiary police at iba pa.

Nanawagan naman siya sa mga apektado ng koordinasyon at pag-intindi para sa ikabubuti at ikakaganda ng Boracay.

PSA-AKLAN MAGAHALIN IT OPISINA

Agud nga mas mayad-ayad pa nga maserbisyuhan ro publiko, ro Philippine Statistics Authority-Aklan hay magasaylo sa bag-ong opisina umpisa sa harang buean it Agosto. 

Halinsa N. Roldan St, Poblacion, Kalibo, ro PSA-Aklan hay magahalin sa mas maeapad nga opisina sa Redepermavic Bldg, nahamtang sa likod it Ten Commandments Bldg nga maeapit sa Capitol Site.

Mga 1.5 kilometers ro distansya it nasambitan nga bag-ong opisina sa existing nga bilding.

Angot kara, ginpaabot it taeatapan ku PSA nga temporary nga pagasarhan ro Serbilis Center umpisa Agosto 31 (Huwebes) hasta Setyembre 1 (Byernes), 2017 para mataw-an it hugada ro paghalin it mga pasilidad.

Owa it pagabatunon nga mga requests sa birth, death, ag marriage certificates eakip man ro certificate of no marriage record sa nasambitan nga mga petsa.

Magabalikro normal nga operasyon it PSA Serbilis Center sa Setyembre 4 (Lunes), 2017 sa nasambitan nga bag-ong lugar. 

Ro PSA hay naga apela sa mga pumueoyo nga may plano nga magbuoe it mga civil registry documents nga magadto it mas temprano sa andangopisina para malikawan ro inconvenience nga matuga it dayang relocation.

ANTONET B. CATUBUAN

Chief Statistical Specialist

PMA ENTRANCE EXAM SA NVC SA KALIBO SA AGOSTO 20

Ang Philippine Military Academy (PMA) ay magsasagawa ng entrance examination sa darating na Agosto 20, Linggo, alas-7:30 sa Northwestern Visayan Colleges (NVC) dito sa bayan ng Kalibo.

Ang entrance exam na gaganapin sa 40 examination center sa buong bansa ay unang hakbang sa selection process para makapasok sa nasabing training school.

Ang mga kadete na makakapasok rito ay maeenjoy ang buong iskolarsyip ng pamahalaan at walang anumang babayaran sa kanilang training sa akademya.

Ang magtatapos sa training sa Bachelor of Science Degree ay komisyon na bilang 2nd Lieutenant at Ensigns ng Armed Forces of the Philippines. 

Ang eksam ay bukas sa lahat, edad 17 hanggang 22 anyos, single at hindi pa nakapag-asawa o buntis.

Dapat ay  walang anumang kaso administratibo o criminal, at dapat ay 5 feet pataas ang taas para sa baae at lalaki.

Magdala lamang nng NSO birth certificate, high school form 137 o 138.

28 ANYOS NA MISIS ARESTADO SA PAGNANAKAW SA DRY GOOD STORE SA KALIBO

Nakakulong ngayon sa Kalibo police station ang isang 28-anyos na misis makaraang magshoplift sa isang dry good store sa Kalibo.

Kinilala ng pulisya ang babae na si Rachel Villanueva y No-o, tubong Sebalew, Banga at nakatira sa brgy. Mataphao, New Washington.

Ayon sa PNP, ang suspek ay nahuling nagsilid ng mga kids garment sa loob ng kanyang bag.

Una rito, napaghalata ng isang promodizer na may kakaibang kilos ang suspek. Kumuha umano ito ng mga kids garments saka pumasok sa fitting room.

Sinundan umano siya ng promodizer ang suspek at nakita ang pagsilid ng mga damit sa kanyang bag.

Pagkatapos ay lumabas lamang umano ang misis sa establisyemento dahilan para habulin ng guard kasama ang miyembro ng auxiliary police at inaresto.

Narekober sa kanyang bag ang isang boy scout tshirt at ilang pares ng medyas. Wala umanong mapakitang ibedensya ang babae sa mga nasabing item kaya siya hinuli.

Posibleng maharap ang misis sa kaukulang kaso.

TOP 5 MOST WANTED SA BAYAN NG TANGALAN ARESTADO MATAPOS ANG 15 TAONG PAGTATAGO

Matapos ang 15 taong pagtatago, naaresto rin ng Tangalan PNP ang top 5 most wanted person sa kanilang listahan sa kasong frustrated homicide.

Kinilala ang akusado na si Ronald Narciso y Villareal, may asawa at residente ng brgy. Dumatad, Tangalan.

Ikinasa ng mga kapulisan ang operasyon sa bisa ng warrant of arrest na inilabas ng Regional Trial Court noon pang Marso 2002.

Ayon kay PO3 Antaran, imbestigador ng Tangalan PNP, naaresto nila ang akusado sa kanilang residensya matapos itong umuwi galing Manila kung saan siya naglagi ng ilang taon.

Php24,000 ang itinakdang pyansa ng korte para sa kanyang pansamantalang kalayaan.

“OPLAN TOKHANG REBOOT” LABAN KONTRA DROGA NG PNP INILUNSAD SA WESTERN VISAYAS

ulat ni Darwin Tapayan, Energy FM 107.7 Kalibo

Inilunsad ng Philippine National Police ang “Oplan Tokhang Reboot” sa Western Visayas nitong Lunes kasama si PNP chief Ronald “Bato”Dela Rosa. 

Nagpahayag naman ng suporta ang gobernador, mga alkalde, iba pang mga opisyal at sectoral leaders ng rehiyon sa pamamagitan ng paglagda sa covenant of support.

Ang programa ay ginawa kasabay ng ika-116  taong pagdiriwang ng  Police Service Anniversary sa Camp Martin Delgado, Iloilo City.

Ayon kay PSSupt. Gilbert Gorero, tagapagsalita ng Police Regional Office (PRO) 6, ang konsepto ng ‘Tokhang Reboot’ ay kagaya ng one stop shop na mayroong ‘tokhang’, assessment, rehab at pangangalaga.

Bahagi rin ng proyekto ang paglalaan ng mga drop boxes sa mga police station at sa mga kabarangayan para sa taumbayan na magbigay ng impormasyon sa mga kilala nilang ‘drug personalities’.

Pinasiguro naman niya na ang karapatang pantao at due process of law ay nangingibabaw sa pagpapatupad ng proyekto.

Sa kabilang banda, sa nasabing programa sinabi ni "Bato" na walang ibang layunin ang pulisya kundi ang ibigay sa mga Pilipino ang mapayapang bansa kahit anuman umano ang mangyari. 

DROP BOXES PARA SA MGA PANGALAN NG DRUG PERSONALITIES SINIMULAN NANG ILAGAY SA MGA KABARANGAYAN SA AKLAN

ulat ni Darwin Tapayan, Energy FM 107.7 Kalibo

Sinimulan nang ilagay sa ilang barangay sa probinsiya ng Aklan at sa mga municipal police station ang mga drop boxes na paglalagyan ng mga pangalan ng mga newly identified drug personalities.

Ayon kay SPO1 Nida Gregas, tagapagsalita ng Aklan Police Provincial Office, ito ay bahagi ng bagong lunsad na “Oplan Tokhang Reboot” laban kontra droga ng Philippine National Police at pamahalaan.

Nilinaw naman ni Gregas na pananatilihin nilang kompedensiyal ang mga impormasyon dito at dadaan rin anya sa tamang proseso at susunod sa karapatang pantao.

Pinasiguro naman niya na dadaan ito sa mabusising proseso kagaya ng koordinasyon sa mga opisyal ng barangay, pag-interview ng pulisya sa umano’y drug personalities, at iba pang proseso.

Kapag napatunayan umano ang itinuturong tao na sangkot sa iligal na droga ay iisasailalim nila ito sa rehabilitasyon depende kung gaano kalala ang kanyang adiksyon.

Sinabi ni Gregas na ang Western Visayas  ay isa sa may pinakamababang nagsurender sa buong bansa; sa Aklan halimbawa sa mahigit  574,000 populasyon, 1945 lamang umano rito ang naitalang sumuko sa pulisya.

Nanawagan naman siya sa taumabayan na maging bukas ang isipan at suportahan ang programa ng pamahalaan at pulisya.

PAGKAMATAY NG 12 MANOK AT PAGKASUGAT NG 9 IBA PA, PALAISIPAN

Misteryosong pagpatay sa mga manok na pansabong patuloy na gumugulo sa isipan ng mga may-ari.

Nadiskubre ang mga manok na may sugat sa likod na bahagi ngunit ang pinagtataka nila ay walang dugo na nakitang nakakalat sa lugar.

Hindi rin umano nag-ingay ang mga manok na ang farm ay napapalibutan ng mga bahay.

Ayon pa sa may-ari umalis umano sila sa lugar dakong alas-6:30 ng gabi pero pagbalik nila banda alas-7:00 ay ito na ang kanilang nadatnan.

Paniwala nila sinipsip ang mga dugo nito ng hindi pa malamang hayop o elemento.

Naganap ito sa Brgy. New Buswang, Kalibo sa isang farm kung saan 12 ang namatay at 9 ang kaparehong may sugat sa likod.

Iniimbestigahan narin ng veterinary office ang nasabing insidente na sa inisyal na reaksyon ay nagtataka rin sa nangyari.

MGA POULTRY PRODUCTS HINIHIGPITAN SA CATICLAN JETTY PORT

Mahigpit ngayon ang pinapatupad na seguridad sa Caticlan Jetty Port para masigurong walang makapasok na anumang poultry products mula sa Luzon.

Ito ang ipinahayag ni jetty port admistrator Niven Maquirang sa panayam ng Energy FM Kalibo kaugnay ng epedimya ng bird flu sa Pampanga.

Sinabi ni Maquirang nagbaba na ng memorandum ang Bureau of Quarantine upang higpitan ang mga pumapasok na poultry products sa probinsiya lalu na sa isla ng Boracay.

Ayon sa administrator, nakikipag-ugnayan naman umano ang mga tauhan ng quaritine sa Caticlan jetty port para inspeksyunin ang mga produktong dumaraan dito.

Sinabi pa ni Maquirang na nitong mga nakalipas na araw ay hidi nakalusot sa port ang kahon-kahong mga balot na lulan ng RoRo mula sa Luzon at ipinabalik ang mga ito.

Dumadaan rin umano sa mabusising inspeksyon ang mga produktong itinatawid sa world-tourist destination na isla ng Boracay.

Nakikipag-ugnayan rin umano siya sa mga coastguard para masigurong ang iba sasakyang pandagat ay dadaan lamang sa Caticlan jetty port para mamonitor.

SUSPEK SA PANANAKSAK SA VIVO, TANGALAN SUMUKO SA BAYAN NG MAKATO

Sumuko na sa opisyal ng brgy. Bagong Barrio, Makato ang suspek sa pananaksak sa brgy. Vivo, Tangalan Linggo ng gabi.

Ang suspek ay napag-alamang isa palang menor de edad.

Matatandaan na agad tumakas ang menor de edad makaraang saksakin ang nakainoman nitong si Noli Trayco, 27 anyos na nagresulta ng agaran niyang kamatayan.

Ayon kay PO3 Antaran, imbestigador ng Tangalan PNP station, dakong alas-9:00 ng umaga kanina nang sumuko ang Children in Conflict with the Law o CICL kay punong barangay Richard Taladro.

Matapos dalhin ng opisyal ang 17-anyos na CICL sa Makato PNP station ay tinurn-over din ito sa Tangalan PNP.

Sa ngayon, nasa kustodiya na ng Municipal Social Welfare and Development Office ang menor de edad at hinihintay nalang ng pulisya ang discerment dito.

Sa kabila nito, hinahanda na ng imbestigador ang kasong murder na ihahain sa piskalya laban sa CICL.

Nabatid na ang menor de edad ay may pamilya sa brgy. Bagong Barrio kung saan siya nagtago matapos ang insidente.