Festival organizer sa mga kandidato: ibigay ang tarpaulin kay Sto. Niño

UMAPELA ANG Kalibo Sto. Niño Ati-atihan Festival Inc. (Kasafi) sa mga kumakandidato na iwasan ang "pangangampanya" sa festival sa darating na Enero.

"Let's give the tarpaulin to Sto. Niño. We appeal until January 20... Let's honor him and give him respect," panawagan ni Kasafi Chairman Albert Meñez sa pulong balitaan araw ng Miyerkules.

Ang apelasyon ay kasunod nang hingin ng media ang kanyang reaksyon sa posibleng pagsamantala ng mga kandidato sa eleksyon sa Kalibo Ati-atihan festival.

"We are all educated, deboto ni Sto. Niño," sabi niya kaugnay sa mga kandidato na nais maglabas ng kanilang tarpaulin para sa pagbati kaugnay ng pagdiriwang.

Sinabi pa niya na hindi umano magiging kaaya-aya kung mukha ng politiko ang makikita katabi ng Sto. Niño sa mga ikinakabit na tarpaulin sa bayang ito.

Umaasa siya na ilalaan ng mga makikilahok sa pagdiriwang ang pagkakataong ito para ipakita ang debosyon sa Sto. Niño, patron ng Kalibo.

Samantala, sa parehong pagpupulong muling sinabi ni Meñez na mahihirapan na silang ibalik ang snake dance dahil sa masikip na ang plaza o kalsada sa panahon ng pagdiriwang ngayon kung ikukumpara noon.

Pinangangambahan rin niya na posibleng magamit ang "snake dance" sa panghihimas ng iba sa kalahok lalo at mahigpit umano ang batas ngayon kaugnay rito.

Sinabi rin niya na bagaman bahagi na ng tradisyon ng Kalibo Ati-atihan festival ang pagsasadula ng "Barter of Panay" napag-alaman umano kalaunan na isa lamang itong kathang-kuwento.

Ang Kasafi ay isang pribadong institusyon na namamahala sa taunang pagdiriwang ng Kalibo Sto. Niño Ati-atihan, tinaguriang "The Mother of All Philippine Festival."##

- Kasimanwang Darwin Tapayan, Energy FM Kalibo

Festival organizer gustong papanatilihin si PSupt Mepania para sa Ati-atihan Festival

LUMIHAM NA sa Regional Police Office 6 ang Kalibo Sto. Niño Ati-atihan Foundation Inc. humihiling na papanatilihin si PSupt. Richard Mepania sa Kalibo PNP.

Dahilan ni Albert Meñez, chairman ng foundation, si Supt. Mepania ay itinalaga bilang ground commander ng nalalapit na na selebrasyon ng Kalibo Ati-atihan Festival.

Katuwiran ni festival organizer chairman Meñez na matagal na umanong napaghandaan ng outgoing chief of police ng Kalibo Municipal Police Station ang seguridad para sa malaking event na ito.

Tumanggi munang magbigay ng pahayag si Mepania ukol dito. Sa ngayon ay nananatili siya sa Kalibo Police Station habang hinihintay ang umano'y finality sa kanyang paglipat.

Aniya ang rason ng paglipat sa kanya ay dahil sa realignment ng mga opisyal. Nabatid na kasama niyang nakatanggap ng parehong atas ay si PSupt Ramer Gallardo na nadestino sa Isla ng Boracay.

Inaayos narin ng Aklan Police Provincial Office ang posibleng pagbabago sa hahawak ng seguridad sa Ati-atihan festival sa Enero ng susunod na taon.

Nabatid na gabi pa ng Disyembre 7 natanggap ni Mepania ang atas sa kanya mula kay PNP Regional Director PCSupt. John Bulalacao na ilipat mula sa Kalibo Police Station para italaga sa Regional Mobile Force.

Sa ngayon pansamantalang itinalaga bilang hepe ng Kalibo PNP ang dating deputy chief of police ng istasyon na si PCInsp. Kenneth Paniza.

Samantala, nabatid na gumagawa narin ng paraan si Mayor William Lachica para mapigilan ang pagpapalipat kay PSupt. Mepania.

Si Supt. Mepania ay naglingkod bilang hepe ng Kalibo PNP simula Pebrero nitong taon.

Kabilang sa mga pinatupad at pinasimulan niya ay ang Oplan Serenata at pagpapaigting ng ilang lokal na ordinasa gaya ng curfew for minors. Siya rin ang nagtalaga ng media corner sa police station.##

- Kasimanwang Darwin Tapayan, Energy FM Kalibo

KATRINA HALILI BISITA SA OPENING SALVO NG KALIBO ATI-ATIHAN FESTIVAL BUKAS

BUKAS NA ang opening salvo ng Kalibo Sto. Niño Ati-atihan Festival – ang tinaguriang “The Mother of All Philippine Festival” – sa Pastrana Park.

Sa panayam ng Energy FM Kalibo kay Albert Meñez, chairman ng Kalibo Sto. Niño Ati-atihan Foundation Inc. (Kasafi) bisita sa event ang sexy actress na si Katrina Halili.

Sinabi ni Meñez na umabot na sa 63 tribes, modern groups at Balik Ati ang kalahok sa event.

Magsisimula ang sadsad ng mga kalahok alas-3:00 ng hapon mula sa Magsaysay Park patungong Pastrana Park kung saan gaganapin ang programa.

Sa programa ipakikilala ang 16 finalists ng Mutya it Kalibo, mensahe mula sa mga opisyal ng bayan at ng probinsiya, at ang pormal na deklarasyon ng pagsisimula ng ilang buwang selebrasyon ng Ati-atihan.

Pagkatapos ay matutunghayan ang mga fireworks at confetti. Ayon kay Meñez pahihintulutang magsadsad lahat kasama ang mga kalahok hanggang alas-10:00 ng gabi.

Sa gabi ay mayroon din kasiyahan sa Magsaysay Park kasama ang mga DJs at iba-ibang banda.

Kasabay ng Ati-atihan Opening Salvo ang pagbubukas rin ng Isla ng Boracay. Paliwanag ng Kasafi chairman, itinuon nila ang opening salvo sa parehong araw para ipagdiwang ang pagbubukas ng Isla.

Una nang naibalita na “in place” na ang mga security preparations ng kapulisan para sa pagdiriwang.##

MGA KATUTUBONG ATI PAPARADA NARIN SA KALIBO ATI-ATIHAN FESTIVAL

Ulat ni Darwin Tapayan, Energy FM 107.7 Kalibo

Nakakita na ba kayo ng mga katutubong Ati na pumaparada at sumasayaw sa Kalibo Ati-atihan festival?

Well, sinusulong ngayon ng Kalibo Sto. Niño Ati-atihan Festival Inc. (KASAFI), festival organizer, na bigyan ng pagkakataon ang mga katutubong ito na lumahok sa pagdiriwang.

Kinumpirma mismo ito ni KASAFI chairman Albert Meñez sa Energy FM Kalibo. 

Kamakailan lang ay personal na binisita ni Meñez ang Ati community sa Brgy. Bulwang, Numancia. Napag-alaman niya na na nais ring pumarada ng mga Ating ito sa kanilang katutubong sayaw suot ang malong.

Ayon pa kay Meñez, ang parada ng mga Ati ay posibleng ganapin sa araw ng Lunes sa pagbubukas ng sang-linggong pagdiriwang sa buwan ng Enero.

Napag-alaman na ang plano ay kasunod ng rekomendasyon ni professor Sharon Masula, PhD., ng Aklan State University – Ibajay .

Nakasaad sa kanyang research na “Ang Realismo at Kahalagahang Pantao sa Pagdiriwang ng Ati-atihan Bilang Salamin at Kultura ng mga Akeanon” ang saloobin ng mga katutubo na mapasama rin sa nasabing selebrasyon.

Ang pag-aaral ay unang binahagi sa ASU University Symposium on Research and Development Highlights nitong Nobyembre 16 sa Banga Campus.

Naniniwala ang professir na isa itong malaking development sa kasaysayan ng "The Mother of All Philippine Festival".