RAPIST SA BANGA, AKLAN ARESTADO

ulat ni Darwin Tapayan, Energy FM 107.7 Kalibo

Arestado ang isang 39 anyos na lalaki  at isang numero unong most wanted person sa bayan ng Banga sa kasong multiple counts of rape.

Naaresto ng mga tauhan ng Banga at Madalag PNP station ang suspek sa  na kinilalang si Daryl Clifford,sa kanilang residensya sa Brgy. Toralba, Banga.

Ang kanyang warrant of arrest ay inilabas at nilagdaan ni Marietta Hemena-Valencia, presiding judge ng regional trial court 6 noong Nobyembre 2002 na walang itinakdang piyansa para sa temporaryong kalayaan.

Pansamantalang ikinulong sa Banga PNP station ang suspek bago iniharap sa kaukulang korte.

Nabatid sa imbestigador na si PO3 Mario Sistorias, posible naman umanong madismiss ang kaso dahil nagkaayos na ang magkabilang partido bago pa lumabas ang warrant laban sa suspek.

Ayon kay Sitorias, pinakasalan na umano ng suspek ang biktima at may tatlo na itong anak.

CURFEW, HINDI MAGIGING ‘NINGAS KUGON’ – KALIBO PNP

ulat ni Darwin Tapayan, Energy FM 107.7 Kalibo

“Hindi magiging ‘ningas kugon’”. Ito ang iginiit ng hepe ng Kalibo PNP makaraang nakakarinig siya ng mga komentong panandalian lamang ang pagpapatupad nila ng curfew.

Sa panayam ng Energy FM Kalibo kay PCInsp. Terence Paul Sta. Ana, sinabi niya na tuloy-tuloy ang isinasagawa nilang pagpapatupad ng curfew mula alas-10 ng gabi hanggang alas-4:00 ng umaga alinsunod sa municipal ordinance no. 045 series of 1994.

Ayon kay Sta. Ana, mas pinaigting nila ang pagroronda sa mga lugar na kadalasang pinangyayarihan ng mga insidente at tinatambayan ng mga menor de edad.

Sinabi pa ng hepe na simula ng pinaigting nila ang pagpapatupad ng curfew mag-aapat na linggo, ay may mga nahuli na silang mga menor de edad na lumalabag rito.

Umaasa naman si Sta. Ana na matuloy at maggawa agad ang gusali na magsisilbing holding area para sa mga children in conflict with the law (CICL) sa bayan ng Kalibo.

Nanawagan rin siya sa mga opisyal at mga tanod ng barangay na makipagtulungan sa pagpapatupad ng batas na ito.

PAGLALAGAY NG MGA RELIGIOUS STATUE SA PASTRANA PARK BINABALAK NG RELIHIYOSONG GRUPO

ulat ni Darwin Tapayan, Energy FM 107.7 Kalibo

Binabalak ngayon ng Catholic Women’s League (CWL) ang pagatatayo ng mga relihiyosong estatwa sa Pastrana Park.

Sa sulat na ipinaabot ni CWL diocesan president Sis. Shirley Ilejay at diocesan spiritual director Fr. Josue Escalona sa Sangguniang Bayan, balak nilang itayo ang mga ito sa likuran ng monumento ni dating Archbishop Gabriel Reyes.

Kabilang sa mga balak nilang itayo ay ang emahe ng Our Lady of Fatima, emahe ng Sagrado Corazon de Jesus at ang sampung utos sa pagitan.

Nangako naman ang relihiyosong grupo na sila ang mangangalaga at magde-develop ng bahaging ito ng Pastrana at tatawaging Mary’s Woods.

Sa pagtalakay sa regular session ng Sanggunian, ikinabahala nila na baka isawalang galang ito ng mga tao lalo na ng mga bata at sa posibilidad na ibandalismo ito.

Nakatakda namang pag-usapan ang panukalang ito sa committee on Pastrana Park.

PAG-RENEW NG PRANGKISA SA MGA TRICYCLE EXTENDED NA

ulat ni Darwin Tapayan, Energy FM 107.7 Kalibo

Extended na ang pag-renew ng prangkisa at body number ng mga tricycle sa bayan ng Kalibo.

Kasunod ito ng pag-apruba ng Sangguniang Bayan sa resolusyon na nagbibigay 30 karagdagang araw para sa mga operator at owner sa pagrenew ng kanilang mga prangkisa sa kanilang seventh regular session.

Ito ang naging kahilingan ni Johnny Damian, presidente ng Federation of Kalibo and Tricycle Operator-Drivers Association Inc. (FOKTODAI) sa alkalde na agad namang binigyan ng tugon ng Sanggunian.

Nabatid na ang pagre-renew ng body number ay hanggang Pebrero 20 lamang at ang late-renewal ay may pataw na Php2,500 na penalidad samantalang ang renewal ng franchise ay may pataw na Php130.

Samantala, nakatakdang magsagawa ng public hearing ang committee on transportation and committee on laws and ordinances Lunes alas-2:00 ng hapon kaugnay ng kahilingan ng FOKTODAI na magtaas ng piso sa kanilang pamasahe.

MALAWAKANG TIGIL PASADA IPINAPATUPAD SA AKLAN

Isinasagawa ngayong araw ng Lunes ng mga driver at operator ang malawakang tigil pasada at kilos protesta sa lalawigan ng Aklan.

Ito ay kasunod nang joint agreement order ng Land TransportationFranchising Regulatory Board (LTFRB) at Department of Transportation (DOTr).

Nakasaad dito ang planong pag-phase-out sa mga lumang jeep gayundin ang pag-require sa mga operator ng hindi bababa sa sampung jeep at minimum na kapital Php 7 milyon upang mapanatili ang kanilang prangkisa.

Pinangunahan ito ng Federation of Aklan Integrated Public Transport Inc. (FAIPTI) at Tsuper at Operator Nationwide (PISTON) – Aklan. Kasama rin sa kilos protesta ang ilang mga aktibong grupo sa pangunguna ng grupong Bagong Alyansang Makabayan (BAYAN) – Aklan.

Dahil rito, apektado ang pasok sa mga paaralan at maging mga trabaho. Nagdulot rin ito ng pagbubuhol ng mga trapiko sa Kalibo dahil sa pagdagsa ng mga pribadong sasakyan na naghahatid-sundo ng kanilang mga pasahero.

Inaasahan na magtatagal ang nasabing tigil-pasada hanggang mamayang hapon.

PROBINSIYA NG AKLAN NAGKUKULANG NG KOLEKSIYON SA DUGO

ulat ni Darwin Tapayan, Energy FM 107.7 Kalibo

Nagkulang ng .95 porsyento sa koleksiyon ng dugo ang lalawigan ng Aklan sa nakalipas na taon ayon sa pahayag ni provincial blood coordinator Roger Debuque sa isinagawang blood coordinating council regular meeting.

Nabatid na sa kabila ng Aklan Blood Coordinating Council (ABCC) para sa mobile blood donation (MBD), ang Libacao ay zero initiative maging ang bayan ng Kalibo.

Karamihan sa mga MBD sa lalawigan ay inorganisa ng mga pribadong grupo sa tulong ng mga lokal na pamahalaan. 

Napag-alaman na sa 63 porysento ng mga kolektang dugo sa taong 2016 ay galing sa mga pribadong grupo samantalang ang 32 porsyento ay sa pamamagitan ng mga lokal na pamahalaan.

Ang mga bayan ng Banga, Lezo, at Malinao ay ginawaran ng insentibo mula sa Department of Health (DOH) makaraang maabot ang isang porsyento ng populasyon sa pagpapatupad ng blood services program.

Target ngayon ng probinsya na ang 5,905 yunit ng dugo sa taong ito at maabot ang isang porsyento ng populasyon ng lalawigan.

Sa kabilang banda, ipinaabot naman ni provincial health officer Dr. Cornelio Cuachon, Jr.  Sa konseho ang planong magsagawa ng patuloy na training para sa mga donor recruitment officer sa mga munisipalidad o kabarangayan kasama na ang mga health workers o nurses at iba pa.

LGU NUMANCIA: PROTEKSYON MUNA BAGO DREDGING

ulat ni Darwin Tapayan, Energy FM 107.7 Kalibo

‘Welcome’ parin sa lokal na pamahalaan ng Numancia ang dredging at flood mitigation project ng probinsiya ng Aklan basta malagyan muna ng proteksyon ang mga barangay na direktang maaapektuhan ng proyekto.

Sa ekslusibong panayam ng Energy FM Kalibo kay Numancia local disaster reduction and management officer II Richard Vega, sinabi niya na dapat munang mai-comply ng Santarli (STL) ang bagong plano para sa nasabing proyekto.

Naniniwala siya na kapag naimplementa ng maayos ay malaking tulong ang nasabing operasyon para maibsan o maiwasan ang mga pagbaha sa kanilang bayan.

Sinabi ni Vega na kapag natuloy ang proyekto, direktang maapektuhan ng dredging operation ang mga lugar ng Camanci Norte, Bulwang, Pusiw, Laguinbanwa at Aliputos, Numancia.

No comment naman si Vega sa isyung mining ang ginawa ng STL sa Aklan river at pinaubuya ang paghuhusga sa mga kaukulang ahensiya ng pamahalaan alinsunod sa kanilang pag-iimbestiga o pagsusuri.

Sa ngayon ay nakahold pa ang dredging vessel ng STL sa baybayin ng Aklan makaraang makitaan ng mga paglabag sa kanilang inisyal na operasyon  kabilang na ang mga trepolante nito.

Si Vega ay nagsisilbing kinatawan ng Numancia sa binuong multi-partite monitoring team ng pamahalaan.

MGA KAPULISAN NAGHAHANDA NA SUMMER SEASON SA BORACAY

Pagkatapos ng hosting ng Association of Southeast Asian Nations (ASEAN) meetings sa Boracay, pinaghahandaan na ngayon ng mga kapulisan ang nalalapit na summer season.

Sinabi ni PSInsp. Jess Baylon, Boracay Tourist Assistance Center (BTAC) chief, ang operasyon ng mga lokal na kapulisan ay balik na sa normal.

Ayon kay Baylon, prayoridad nila ngayon ang summer season sa isla kung saan inaasahan ang pagdagsa ng malaking bilang ng mga turista.

Sinabi pa ng hepe na inaayos na nila ang “Oplan Summer Vacation (SumVac)” para sa mga buwan ng summer, kung saan ipinagdiriwang ang Holy Week at ang Laboracay.

Samantala, 50 mga bagong pulis ang naidestino sa Boracay para sumailalim sa field training sa loob ng anim na buwan.

Nabatid na ang BTAC ay may 87 organic na mga tauhan at 48 augmented members. - PNA

PAGPAPANGAL NG NATIONAL ROAD KAY ATTY. QUIMPO ISINUSULONG SA KONGRESO

ulat ni Darwin Tapayan, Energy FM  107.7 Kalibo

Isinusulong ngayon sa kongreso ang pagpapangalan ng national road sa probinsiya sa dating kongresista ng Aklan.

Naniniwala si congressman Carlito Marquez na mabilis lamang na maaprubahan ang mga local bill sa kongreso kabilang na ang inihain niyang house bill 5035.

Isinasaad sa panukalang ito ang pagsasapangalan ng Kalibo-Banga-Balete-Batan-Altavas national road o mas kilala rin bilang Kalibo highway mula sa interseksyon ng Kalibo-Banga-New Washington sa Brgy. Andagao, Kalibo patungong Altavas, Aklan bilang Congressman Allen Salas Quimpo national highway.

Una rito, nabatid na nagpasa rin ng resolusyon ang Sangguniang Panlalawigan ng Aklan at Sangguniang Bayan ng Kalibo upang hikayatin ang kasalukuyang kongresista na isulong ang nasabing panukalang batas.

Naniniwala si Marquez na sa ganitong paraan ay mabigyan ng karangalan ang mga naiambag ng dating kongresista sa pag-unlad ng Aklan.

Si Quimpo ay naglingkod bilang kongresista ng Aklan noong 1992 hanggang 2001 kung saan naging kasangkapan siya upang maipakonkreto ang nasabing highway.

LGU KALIBO POSIBLENG MAGTAYO NG TOURIST CENTER SA BAKHAWAN ECO-PARK

ulat ni Darwin Tapayan, Energy FM 107.7 Kalibo

Mas pagtitibayin ngayon ng lokal na pamahalaan ng Kalibo at ng Kalibo Save the Mangrove Association (KASAMA) ang kanilang ugnayan para sa pag-promote ng Bakhawan Eco-Park bilang isang tourism destination.

Sinabi ni Midelyn Quadra, forest technician II ng Aklan Provincial Environment and Natural Resources (PENRO), sa Sangguniang Bayan regular session na maaring magtayo ng tourist center ang Kalibo sa nasabing eco-park.

Ito ay kasunod nang busisiin sa Sangguniang Bayan regular session ang umiiral na memorandum of agreement (MOA) ng lokal na pamahalaan at ng KASAMA at ng USWAG foundation.

Sa pagbusisi ng MOA taong 1998, napag-alaman na hindi na nasusunod ang mga kasunduang itinatakda rito at kulang na ang ugnayan ng mga nasabing partido.

May posibilidad namang baguhin ang nasabing MOA para mapabuti pa ang ugnayan ng munisipyo sa mga pribadong grupo.

Nilinaw naman ni Merlene Aborka, chief technical division ng PENRO-Aklan na ang eco-park ay pagmamay-ari ng DENR at pinamamahalaan ng KASAMA.

ONE SIDE AT PAY PARKING, BINABALAK SA KALIBO

ulat ni Darwin Tapayan, Energy FM 107.7 Kalibo

Para maibsan ang bigat ng trapiko sa Kalibo balak ngayon ng traffic and transport management unit (TTMU) na gawing one-side parking ang ilang mga kalsada samantalang ang mga iba pa ay gagawing pay parking.

Inirekomenda nina SPO2 Bantigue at SPO4 Rene Armenio ng Kalibo PNP station, ang Veterans avenue sa likuran ng provincial hospital bilang pay parking samantalang ang sa likuran naman ng munisipyo ay gagawing one-side parking.

Balak ring gawing one-side parking ang mga lansangan ng Acevedo, Goding Ramos at L. Barrios, at bahagi ng Pastrana. No parking both side naman ang plano para sa mga lansangan ng Archbishop Gabriel M. Reyes, 19 Martyrs, at F. Quimpo.

No left turn ang Roxas avenue, at C. Laserna. Ang mga lansangan ng N. Roldan at J. Magno ay one way. Samantalang ang Mabini street mula Regalado street ay no left turn.

Plano ring gawing one-side parking ang Toting Reyes street at no u-turn naman sa Novo hotel patungong Motus pharmacy at ang Roxas avenue extension patungong Gaisano.

Magsasagawa uli ng meeting ang TTMU para pag-aralan pa ang mga rekomedasyong ito bago sila magsagawa ng dry-run.

PHP40M PONDO MULA SA KONGRESO NILALAKAD NG LGU KALIBO PARA SA IBA-IBANG PROYEKTO

ulat ni Darwin Tapayan, Energy FM 107.7 Kalibo

Nilalakad na ngayon ng lokal na pamahalaan ng Kalibo ang paghingi ng Php40 milyon na pondo mula sa iba-ibang miyembro ng kongreso upang pondohan ang iba-ibang proyekto ng munisipyo.

Ang mga pondong ito ay gagamitin sa pagtatayo ng Oyo Torong satellite market, konstruksyon ng Kalibo terminal, paggawa ng iba-ibang drainage system sa munispiyo at karagdagang pondo sa itatayong evacuation center, at rehabilitation ng Kalibo Public Market.

Nakasaad sa mga ipinasang resolusyon ng Sangguniang Bayan na ang bawat proyekto ay may inilaang tig-Php10 milyon.

Samantala, nagpasa rin ng resolusyon ang Sanggunian na humihiling sa Department of Public Works and Highways (DPWH) na maglaan ng pondo sa paglalagay ng traffic lights sa D. Maagma st. corner Mabini st., at F. Quimpo extension corner Mabini st.

Hihilingin rin sa DPWH ang paglalagay ng street light mula sa Kalibo International Airport, Jaime Cardinal Sin avenue patungong Kalibo-Numancia bridge.

56 ANYOS NA MISTER ARESTADO NG PDEA-VI SA PAGTUTULAK NG DROGA

ulat ni Darwin Tapayan, Energy FM 107.7 Kalibo

Arestado ang isang 56-anyos na mister sa isinagawang buybust operation ng mga tauhan ng Philippine Drug Enforcement Agency (PDEA) region VI Miyerkules ng gabi sa L. Barrios St., Kalibo.

Kinilala ang naaresto na si Ricky Fuentes y Yap ng Poblacion, Tangalan.

Nakuha sa kanya ng poseur buyer ang isang gramo sachet ng na naglalaman ng pinaghihinalaang shabu kapalit ng Php7,500.

Narekober din sa kanyang posisyon ang subscribe at boodle money at isang pakete ng isang bolto ng pinaniniwalaang shabu.

Sa panayam ng Energy FM Kalibo sa suspek, pinabulaanan niya na nagtutulak siya ng droga pero aminado ito na matagal na siyang gumagamit nito.

Sinabi rin ng suspek na isa siyang drug surenderee sa Tangalan.

Samantala, sa panayam naman kay PDEA team leader Fil Tangeres na matagal na umano nilang minamanmanan ang lalaki

Pansamantalang nasa kustodiya ngayon ng Kalibo PNP ang naturang lalaki at posibleng maharap sa kasong paglabag sa RA 9165 o Comprehensive Dangerous Drugs Act of 2002.

2,000 CALL CENTER AGENTS NAKATAKDANG I-RECRUIT SA KALIBO

Grab this opportunity mga kasimanwa!

Nakatakdang mag-recruit ng 2,000 call center agent ang ang isang kilalang call center company sa bayan ng Kalibo sa darating na Marso.

Ito ay base sa komunikasyong natanggap ni Efren Trinidad, Peso manager ng Kalibo, mula kay Hezekiah Castro ng provincial partnership lead ePerformax Contact Centers and BPO.

Ayon kay Trinidad, magsasagawa umano sila ng recruitment sa Citymall sa Kalibo sa darating na Marso 14 simula alas-10:00 ng umaga hanggang alas-4:00 ng hapon.

Pwedeng mag-apply ang mga Kalibonhon na 18-anyos pataas, high school graduate at may one-year work experience o college level. Mahalaga na mahusay sa pagsulat at pagsasalita sa ingles ang mga mag-a-apply at handang magtrabaho sa shifting schedule at mga holiday.

Ang mga matatanggap ay ipapadala sa kanilang site sa Roxas City, Capiz.

70 PULIS IDI-DEPLOY SA KALIBO AT BORACAY

Pitumpong bagong recruit na mga police officer 1 ang nakatakdang i-deploy sa Kalibo at Boracay sa loob ng limang buwan.

Ayon kay SPO1 Nida Gregas, public information officer ng Aklan Provincial Police Office, ito ay bahagi ng kanilang field training program.

Ang mga police officer na ito ay dadaan sa patrol, traffic at investigation phases bilang requirement sa pagiging permanente sa tungkulin.

Pinangunahan nina PSInsp. Evangeline Ufano ng human resource and development division at PCInsp. Bernard Ufano ng provincial intelligence branch, ang pagbubukas ng field training program.

Isinagawa ang aktibidad Miyerkules ng umaga sa Aklan Police Provincial Office na dinaluhan ng mga field training officers (FTO) na nakatalaga sa pagtrain sa mga nasabing pulis.

BAYARIN SA ELEKTRISIDAD NG AKELCO TUMAAS NG Php0.40/KWH

ulat ni Darwin Tapayan, Energy FM 107.7 Kalibo

Tumaas ng Php0.40 bawat kilowatt hour ang bayarin sa elektresidad ng Aklan Electric Cooperative (AKELCO) ngayong buwan ng Pebrero kumpara sa nakalipas na buwan.

Sa inilabas na report ng AKELCO, ang bayarin para sa mga residential consumer na gumagamit ng 21kwh pataas ay Php10.3190/kwh. Sa low voltage consumer commercial, industrial, public building, at street light naman ay Php9.3783.

Ayon sa AKELCO, malaki ang epekto ng pass-on charges sa pagtaas ng bayarin sa elektresidad alinsunod sa ipinapatupad ng Energy Regulatory Commission (ERC).

Pinakamalaki rito ay napupunta sa generation system charge na sinisingil ng mga independent power producer. Ang iba pa ay para sa transmission charge at government mandated charges kagaya ng EVAT.

Dagdag pa rito, ang pagbili ng wholesale electricity market ng kompanya para matugunan ang lumalaking pangangailangan sa elektrisidad ay isa ring dahilan ng pagtaas ng bayarin.

Patuloy namang ipinapaalala ng AKELCO sa taumbayan ang pagtitipid at tamang paggamit ng elektresidad.

TINDERO NG ICE BUKO, SINAKSAK NG KANYANG KAINUMAN

ulat ni Darwin Tapayan, Energy FM 107.7 Kalibo

Naka-confine parin sa surgical intensive care unit ng Dr. Rafael S. Tombokon Memorial Hospital ang isang 53 anyos na tindero ng ice buko makaraang saksakin ng kanyang kainuman Linggo ng hapon sa Spanish rd., Brgy. New Buswang, Kalibo.

Kinilala ang biktima na si Jose Bandian, 53 anyos, at residente ng Ati-atihan sa parehong barangay.

Sa imbestigasyon ng Kalibo PNP, nag-iinuman ang biktima kasama ang suspek na si Ronilo Zonio, 40 anyos, residente ng parehong lugar nang magkaroon ng mainitang pagtatalo sa kanilang dalawa.

Sa galit ng suspek ay bumunot ito ng kutsilyo at sinaksak ang biktima na tumama s

a kaliwang ibabang bahagi ng kanyang dibdib.

Sa panayam ng Energy FM Kalibo sa asawa ng biktima, wala na umano silang pagnais na magsampa ng kaso laban sa suspek at sa halip ay sagutin ang mga gastusin nila sa ospital.

MAHINA AT MAHAL NA INTERNET CONNECTION, IKINADISMAYA NG SP AKLAN

Dismayado ang ilang miyembro ng Sangguniang Panlalawigan ng Aklan sa mabagal at mahinang internet connection sa lalawigan sa isinagawang committee hearing Lunes ng hapon.

Dinaluhan ang committee hearing na ito ng mga telcos, at mga negosyante na pinangunahan ni committee chair on energy, public utilities and transportation Nemesio Neron.

Hindi naman sumipot sa pagdinig na ito ang mga kinatawan ng Smart at Globe at naging tagasalo ng reklamo at katanungan ang dalawang cable companies na Aklan at Kalibo cable television network.

Paliwanag nila, hindi dapat umano sila ang sisihin sa bagay na ito kundi ang mga telecommunication companies na pinagkukunan nila ng koneksiyon.

Sinabi naman ni vice governor Reynaldo Quimpo sa parehong pagdinig na hindi pa handa ang Aklan para sa information technology - business process outsourcing dahil sa mahinang internet connection.

IBA PANG MGA BAYAN SA AKLAN HINIKAYAT NA I-DEVELOP ANG KANI-KANILANG ECO-TOURISM SITE

Dahil sa patuloy na paglago ng industriya ng turismo sa isla ng Boracay, hinikayat ni Caticlan jetty port administrator Niven Maquirang na simulang i-develop ang iba pang mga eco-tourism site sa lalawigan.

Ayon kay Maquirang, malaki umano ang potensiyal ng mainland sa tourism industry lalu na sa mga nakatakdang pagpapaunlad sa Boracay.

Iginiit ng port administrator na ang mga bayan malapit sa Boracay lalu na ang mainland Malay, Nabas, Buruanga, Tangalan and Kalibo, ay may malaking potensyal bilang alternatibong lugar para sa mga turista.

Kabilang sa mga kilalang eco-tourism destination sa mga bayang ito ay ang Pangihan cave at Nagata falls sa Malay, Hurom-hurom cold springs at ang windmill sa Nabas, ang Jawili beach at waterfall sa Tangalan, cliff jumping site at Hinugtan beach sa Buruanga.

Nabatid na isa sa mga partikular na pag-unlad na magpapalago pa ng sa mga turistang bumibisita sa Boracay ay ang nakatakdang pagtatayo ng cruise ship hub ng Royal Caribbean Inc. sa Caticlan. – PNA

SANGGUNIANG PANLALAWIGAN NG AKLAN, ISA NANG ISO CERTIFIED

ulat ni Darwin Tapayan, Energy FM 107.7 Kalibo

Isa nang International Standard Organization (ISO) certified ang Sangguniang Panlalawigan ng Aklan.

Nangangahulugan ito na lahat ng mga proseso, mga hakbang at sistemang ipinatutupad sa sangguniang panlalawigan ay naaayon sa international standard alinsunod sa ISO 9001:2008.

Nabatid na ang sangguniang panlalawigan ang una at nag-iisang nasertipekahan sa mga tanggapan ng provincial goverment.

Naniniwala ang Sanggunian sa pamumuno ni vice governor Reynaldo Quimpo na ang karangalang ito ay dahil sa malaking naiambag nila sa pagkamit ng probinsiya ng Seal of Good Local Governance at ng EXCELL award.

Napag-alaman rin na ang mga staff ng Sanggunian ay sumailalim sa mga training at seminar na pinangasiwaan ng TUVRheinland noong nakaraang taon.

Sumailalim rin sa two stages of external audit ng TUVRheinland ang mga hakbang, proseso, mga record at mga dokumentasyon ng SP.

Natanggap ng SP ang naturang sertipikasyon Pebrero 14 nitong taon.

Bubuksan naman ang panibagong legislative building ng pamahalaang lokal ng Aklan sa Marso sa state of the province address ng gobernador.

ENERGY EXCLUSIVE: MGA TAGA-BAKHAW NORTE, KALIBO NAGSAGAWA NG THANKS GIVING MASS

ulat ni Darwin Tapayan, Energy FM 107.7 Kalibo

Maribeth Cual

Nagsagawa ng thanksgiving mass ang mga taga-Bakhaw Norte Kalibo sa So. Libuton araw ng Linggo ilang araw makaraang ipinatigil ng Department of Environment and Natural Resources (DENR) ang dredging operation sa kanilang lugar.

Pinangunahan ni Fr. Ulysses Dalida ng Dioceses of Kalibo ang misa na dinaluhan ng mga tagaroon at ilang lokal na opisyal ng pamahalaan.

Naging panauhin sa thanksgiving mass sina Kalibo mayor William Lachica, sangguniang bayan member Rodelio Policarpio, Aklan sangguniang panlalawigan member Harry Sucgang at Noli Sodusta.

Nanindigan si mayor Lachica na itigil na ang dredging operation ng Santarli (STL) Resources Inc. Ltd.

Emosyonal naman ang punong-barangay na si Maribeth Cual sa kanyang pahayag matapos gunitain ang mga dinanas na mga paghihirap para maipatigil ang operasyon ng kompanya.

Ipinahayag naman ng taumbayan at ng mga opisyal ang kanilang pasasalamat sa mabilis na aksiyon ni DENR sec. Gina Lopez nang ipatigil niya ang dredging operation sa lugar.

ENERGY EXCLUSIVE: SCOTTISH FLIGHT ATTENDANT GINAHASA SA BORACAY

ulat ni Rolly Boy Herera / Darwin Tapayan, Energy FM 107.7 Kalibo

Ginahasa ng isang resort maintenance ang isang Scottish national at flight attendant sa Brgy. Balabag, Isla ng Boracay Lunes ng madaling araw.

Sa sinumpaang salaysay ng 36-anyos na turista sa provincial prosecutor’s office, niyaya umano siya ng suspek na makipag-inuman sa ibang bar dahil magsasara na ang bar ng hostel na un

a na niyang pinag-inuman.

Nagtiwala naman ang biktima sa suspek dahil sa empleyado umano ito ng hostel na tinutuluyan niya.

Hindi niya akalain na dadalhin siya ng suspek sa isang kuwarto at doon sekswal na sinamantalahan.

Matapos ang insidente ay agad na tumakas ang babae at nagsumbong sa Boracay Tourist Assistance Center.

Sa follow-up investigastion ng pulisya, ay naaresto nila ang suspek na kinilalang si Lito Cerencio y Doclora, 26-anyos, tubong Brgy. Unat, Ibajay.

Nahaharap sa kasong rape ang suspek at walang itinakdang piyansa sa kanyang temporaryong kalayaan.

ALOHA LANDMARK NAKATAKDANG ALISIN

ulat ni Darwin Tapayan, Energy FM 107.7 Kalibo

photo (c) laaglaag

Nakatakdang i-demolish ang aloha sa harapan ng Kalibo Pilot Elementary School sa Mabini St., sa bayan ng Kalibo.

Sinabi ni mayor William Lachica sa isinagawang flag raising ceremony ng munisipyo araw ng Lunes, nakatakdang alisin ang nasabing rotonda at ang estatwa ng ati sa itaas nito ay ililipat.

Ayon kay Lachica, lalagyang umano ng overpass ang harapan ng nasabing paaralan. Maliban rito, lalagyan rin anya ng overpass ang harapan ng Dr. Rafael S. Tumbokon Memorial Hospital at ang crossing Banga-New Washington.

Nagpasa na ng resolusyon ang Sangguniang Bayan na humihingi ng pondo sa Department of Public Works and Highway para sa nasabing proyekto.

Ang pag-alis sa nasabing rotonda at pagtatayo ng mga overpasses sa bayan ng Kalibo ay ilan sa mga nakikita ng pamahalaang lokal na makakapagaan sa daloy ng trapiko.

SANGGUNIANG PANLALAWIGAN NG AKLAN, ISA NANG ISO CERTIFIED

ulat ni Darwin Tapayan, Energy FM 107.7 Kalibo

Isa nang International Standard Organization (ISO) certified ang Sangguniang Panlalawigan ng Aklan.

Nangangahulugan ito na lahat ng mga proseso, mga hakbang at sistemang ipinatutupad sa sangguniang panlalawigan ay naaayon sa international standard alinsunod sa ISO 9001:2008.

Nabatid na ang sangguniang panlalawigan ang una at nag-iisang nasertipekahan sa mga tanggapan ng provincial goverment.

Naniniwala ang Sanggunian sa pamumuno ni vice governor Reynaldo Quimpo na ang karangalang ito ay dahil sa malaking naiambag nila sa pagkamit ng probinsiya ng Seal of Good Local Governance at ng EXCELL award.

Napag-alaman rin na ang mga staff ng Sanggunian ay sumailalim sa mga training at seminar na pinangasiwaan ng TUVRheinland noong nakaraang taon.

Sumailalim rin sa two stages of external audit ng TUVRheinland ang mga hakbang, proseso, mga record at mga dokumentasyon ng SP.

Natanggap ng SP ang naturang sertipikasyon Pebrero 14 nitong taon.

Bubuksan naman ang panibagong legislative building ng pamahalaang lokal ng Aklan sa Marso sa state of the province address ng gobernador.

HIRIT NA PAGTAAS NG PAMASAHE SA TRICYCLE SA KALIBO, IDADAAN SA PUBLIC HEARING

Humarap na sa committee hearing ang ilang mga tricycle operator and drivers association kaugnay ng hirit nilang pagtaas ng piso sa tricycle sa bayan ng Kalibo.

Sa kasalukuyan ang regular na pamasahe ay Php7.50 maliban sa mga senior citizen, estudyante, at mga differently abled, ay may sinunod namang discount rate.

Ipinaabot ni Mr. Johnny Damian, presidente ng Federation of Kalibo Tricycle Oprerators and Drivers Association Inc. (FOKTODAI) na marami na sa kanyang mga kasama ang humihirit na magtaas ng pamasahe. Paliwanag nila, pumalo na sa Php38 hanggang Php39 ang presyo ng gasoline.

Sang-ayon naman ang komitiba sa kahilingang ito pero sinigurado ang deskwento ng mga estudyante, senior citizen at PWD ay Php6.20 o Php6.00 lamang.

Nagkasundo naman ang committee on rules, laws and ordinances at committee on transportation na magsasagawa sila ng public hearing kaugnay dito sa Pebrero 27.

PENRO-AKLAN HINDI SANG-AYON NA DUMAONG ANG ISA PANG BARKO NG STL

ulat ni Darwin Tapayan, Energy FM 107.7 Kalibo

Hindi sang-ayon si Merlene Aborka, chief, technical division ng Provincial Environment and Natural Resources Office (PENRO)-Aklan na dumaong ang isa pang barko ng Santarli Resources Inc. Ltd. sa baybayin ng Kalibo.

Sa panayam ng Energy FM Kalibo, nakatakdang magpadala ng sulat si Aborka sa gobernador at Philippine Coastguard Dumaguit upang ipahayag ang pagtutol sa pagdaong ng barko sa baybayin ng Kalibo.

Paliwanag ni Aborka, wala umanong dahilan ang STL para mag-refuel ng kanilang naunang barko na nakadaon ngayon sa probinsiya ng Aklan dahil nakahold pa ito dahil sa mga pending na kaso.

Nabatid na una nang nagpadala ng sulat si STL managing director Patrick Lim kay governor Florencio Miraflores upang ipaalam ang nakatakdang pagdaong ng barko sa araw ng Sabado.

Napag-alaman base sa kumpirmasyon ng coastguard Dumaguit na hindi nakarating ang barko dahil kinulang sila gatong o fuel kaya dumiretso ito sa Iloilo.

Samantala, epektibo parin anya ang cease and desist order ng DENR-PENRO laban sa STL dahil pinag-aaralan pa nila ang naging tugon ng STL hinggil dito.

PAMUNUAN NG PROVINCIAL HOSPITAL IPAPATAWAG SA SP RE: DOWNGRADING OF SERVICE

ulat ni Darwin Tapayan, Energy FM 107.7 Kalibo

Ipapatawag ng committee on health ng Sangguniang Panlalawigan ng Aklan ang pamunuan ng Dr. Rafael S. Tombokon Memorial Hospital upang usisain ang operasyon at serbisyo ng nasabing pagamutan.

Ito ay matapos na ipinaabot ni SP member Noli Sodusta sa regular session ng Sanggunian na nakatanggap umano siya ng mga impormasyon na downgraded na ang provincial hospital sa level 1.

Paliwanag ni Sodusta, may mga nakausap umano siyang mga indibidwal na nagrereklamo sa mga kakulangan ng hospital. Hindi naman naging malinaw sa kanyang pahayag kung patungkol saan ang mga reklamong iyon.

Ipinapa-verify naman ni vice governor Reynaldo Quimpo ang impormasyong downgraded ang nasabing pagamutan sa level 1. Taliwas sa impormasyong ito,

iginiit ni Quimpo na nag-aa-upgrade pa nga ang hospital.

Sang-ayon naman ang mga miyembro ng Sanggunian sa kahilingang ito ni Sodusta. Samantala, handa naman si committee on health chair Nelson Santamaria na ipatawag ang hepe ng provincial hospital pati ang pamunuan ng provincial health office.

Nais rin ipaabot ni SP Soviet Dela Cruz kung paano makapaglalaan ng anti-venom ang hospital matapos kamakailan lamang ay may nakarating sa kanyang ulat na may nakitang kobra sa kalsadahin ng isang bayan.

PLATTERS, MAGKOKONSYERTO SA AKLAN NGAYONG BUWAN NG MGA PUSO

ulat ni Darwin Tapayan, Energy FM 107.7 Kalibo

Gusto niyo bang makinig sa mga walang kupas at magagandang tunog at awitin ng 50’s at 60’s?

Magkokonsyerto sa Aklan ang sikat na American vocal group na Platters mula sa Branson, Missouri sa darating na Pebrero 19 sa ABL Sports Complex, Kalibo alas-7:00 ng gabi.

Kasama rin ng grupo ang special guest na si Johnny Thompson, ang no. 1 Elvis Presley impersonator sa Las Vegas.

Ang grupo ay kakanta ng kanilang mga classical music hit na “Only You (ang una nilang big hit)”, “The  Great Pretender”, “Smoke Gets In Your Eyes”, “It’s Magic”, “May Prayer”, “Twilight Time” at marami pang iba.

Ang konsyertong ito ay naglalayong makalikom ng pondo para sa mga proyekto ng Sto. Nino Seminary Alumni Association.

Katuwang ng asosasyon sa paghost ng konsyerto sina Aklan Sangguniang Panlalawigan member Nolly Sodusta, Kalibo Sangguniang Bayan member Juris Sucro, at Aklan Congressman Carlito Marquez.

8 KALALAKIHAN NAARESTO SA PAGLALARO NG PUSOY SA BORACAY

ulat ni Darwin Tapayan, Energy FM 107.7 Kalibo

Walong kalalakihan ang inaresto ng mga tauhan ng Boracay Tourist Assistance Center (BTAC)

Martes ng madaling araw makaraang mahuling naglalaro ng pusoy sa So. Manggayad, Brgy. Balabag, sa isla ng Boracay.

Ayon sa report, nakatanggap umano ng impormasyon ang hepe ng BTAC na si PSInsp. Jess Baylon na may iligal na pagsusugal sa roptop ng Family Mart sa nasabing lugar.

Matapos sumailalim sa surveillance, malinaw na nakita ng mga awtoridad ang mga grupo ng kalalakihan na naglalaro ng pusoy.

Dito na pumasok ang mga awtoridad at inaresto sina Jerson Daing, Benjamin Sta. Maria, Joniel Traifalgar, Syrel Cris Gendraya, Joban Maquiling, Fernan Albando, Art John Derla, at Vicente Sta. Maria, lahat nasa legal na edad at kasalukuyang naninirahan sa nasabing barangay.

Nakumpiska rin ng mga kapulisan ang mga playing card, blanket, at bet money na nagkakahalaga ng Php813.75.

24 ANYOS NA LALAKI, KALABOSO SA KASONG SIMPLE SEDUCTION

ulat ni Darwin Tapayan, Energy FM 107.7 Kalibo

Kalaboso ang isang 24 anyos na lalaki sa Brgy. Lilo-an, Malinao sa bisa ng warrant of arrest sa kasong simple seduction.

Naaresto ng mga tauhan ng Malinao PNP station si Louie Yerro y Santiago, residente ng parehong lugar dakong alas-8:30 ng umaga. 

Ang warrant of arrest na may criminal case no.  13450 ay inilabas at nilagdaan ni Bienvenido Barrios Jr. ng Branch 3, Regional Trial Court VI.

Agad namang nakapiyansa ang akusado sa halagang Php12,000.

Ang simple seduction ay sa ilalim ng Article 338 ay seduction (o sekswal na pamimilit) sa isang babae, wala pang asawa o balo na may magandang resputasyon, edad 12 anyos hanggang 18 anyos, na nagawa sa pamamgitan ng panluluko.

KOREANO NINAKAWAN NG MASAHISTANG BADING SA BORACAY

ulat ni Darwin Tapayan, Energy FM 107.7 Kalibo

Nagkilala. Nagpamasahe. Nag-inuman. Ninakawan.

Ito ang kuwentong ng 20 anyos na lalaking Korean National na ninakawan ng mamahaling cellphone ng isang lady boy o bading Lunes ng umaga sa Isla ng Boracay.

Kuwento ng biktimang si Kim Do Yun sa Boracay Tourist Assistance Center (BTAC), nakilala niya ang suspek sa isang bar dakong alas-4:00 ng umaga. Dito siya inalok ng bading

ng masahe.

Dinala ng Koreano ang bading sa hotel na tinutuluyan niya sa Brgy. Balabag sa nasabing isla. Dahil walang maipakitang ID, kinunan nalang ng ritrato ang bading upang makapasok sa hotel.

Habang nasa kuwarto, nagpamasahe at nakipag-inuman ang turista sa bading at matapos nito ay inihatid pa sa elevator. Bumalik naman ang Koreano sa kuwarto para matulog dala ng sobrang kalasingan.

Pagkagising ng Koreano, laking gulat niya na nawawala na ang kanyang cellphone na tinatayang nagkakahalaga ng Php35,000.

Sa pag-usisa sa kuha ng CCTV footage, nakita ang bading na bitbit na ang cellphone ng Koreano.

Sa ngayon ay nagpapatuloy pa ang imbestigasyon ng pulisya sa kasong ito.

MANGINGISDA, NAILIGTAS SA BAYBAYIN NG ANTIQUE

ulat ni Darwin Tapayan, Energy FM 107.7 Kalibo

Maswerteng nailigtas ang isang mangingisda sa baybayin ng

Brgy. Pusiw, Libertad, Antique makaraang tangayin ng malalakas na alon.

Linggo ng umaga, naiulat na nawawala ang biktimang nakilalang si Vincent Canlog, residente ng Pandan, Antique.

Kuwento ng kanyang step son sa pulisya ng Pandan police station, pumalaot umano ng mag-isa ang biktima sakay ng isang bangkang de makena pampangisda dakong alas-4:00 ng umaga.

Nagtaka na lang umano sila na hindi na ito na kauwi alas-8:00 ng umaga kung saan oras ng karaniwan niyang pag-uwi mula sa pangingisda.

Sinubukan pa umano nilang hanapin siya at ang kanyang bangka pero hirap umano silang makita ito.

Makaraan ang isang araw, alas-8:00 ng umaga ng Lunes, nadatnan ng Barkong MV Amazing Grace ang nasabing biktima na palanguy-langoy sa dagat. Agad naman siyang nailigtas ng mga rescuer ng barko.

MOTORSIKLO SUMALPOK SA VAN SA BALETE, AKLAN, 1 PATAY

ulat ni Darwin Tapayan, Energy FM 107.7 Kalibo

Shan Tabz photo

Binawian ng buhay ang isang 38 anyos na lalaki makaraang sumalpok ang sinasakyang motorsiklo sa isang nakaparkeng van sa Brgy. Poblacion, Balete.

Kinilala ang biktima na si Roger Barrientos, ng Brgy. Arcanghel Sur, Balete, na nagtamo ng malubhang sugat sa ulo.

Sugatan rin ang kanyang tiyuhin at driver ng motorsiklo na si Gilbert Cuales, 52, residente rin ng Brgy. Arcanghel, na patuloy na ginagamot sa provincial hospital.

Matatandaan na Martes ng gabi, papauwi na umano ang mga biktima mula sa bayan makaraang magtaya ng lotto nang makasalubong nila ang nakakasilaw na ilaw ng kasalubong na sasakyan. Dito umano niliko ng driver ang motorsiklo at hindi nakitang may nakaparkeng isang van dahilan para sumalpok ito doon.

Binawian ng buhay si Roger Huwebes dakong 10:20 ng gabi habang ginagamot sa surgical intensive care unit ng provincial hospital.

Samantala, masama ang loob ng nanay ng namatay na biktima na driver ng ambulansiya na hindi isinakay ang kanyang anak upang isugod sa ospital maliban sa tiyuhin nito. Sinabi umano niya na patay na ang biktima at masikip na para isabay pa sa ambulansiya.

Dagdag pa ni Nanay Elsie, ilang minuto pa ang lumipas bago siya maisugod sa ospital sakay ng patrol ng Balete PNP station.

LUXURY CRUISE SHIP, DADAONG SA BORACAY SA ARAW NG MGA PUSO

Ulat ni Darwin Tapayan, Energy FM 107.7 Kalibo

Pinasigurado na ng pamunuan ng Caticlan Jetty Port ang kaligtasan ng mga bisitang sakay ng luxury cruise line Celebrity Constellation na nakatakdang dumaong sa unang pagkakataon sa Isla ng Boracay sa Pebrero 14.

Nilinaw ni port administrator Niven Maquirang na bagaman magiging abala ang mga security personnel sa pagbibigay seguridad sa mga delegado ng ASEAN Summit na idaraos sa parehong linggo, hindi umano nila isasantabi ang mga cruise visitor.

Pahayag ni Maquirang na magtatagal lamang ng alas-8:00 ng umaga hanggang alas-5:00 ng hapon ang cruise ship sakay ang nasa 2,100 pasahero.

Samantala, nakatakda namang mag-return visit ang MS Europa II at MS Seabourn Sojourn sa Pebrero 15 at Pebrero 25 ayon sa pagkakasunod.

Sa Pebrero 28 naman ay darating sa unang pagkakataon ang MS Crystal Symphony at ang pagbabalik ng Seven Seas Voyager. – PNA

TEAM AKLAN OVER ALL CHAMPION SA PENCAK SILAT SA WVRAA

Ulat ni Darwin Tapayan, Energy FM 107.7 Kalibo

Photo: (c) Jasper Jay Lachica FB

Over-all champion ang team Aklan sa larong Pencak Silat sa Western Visayas Regional Athletic Association meet sa Antique. Nag-uwi ang grupo ng apat na gintong medalya, isang bronze at dalawang silver.

Nakuha ni Jasper Jay Lachica ang dalawang gintong medalya mula sa tanding at tungal boys category. Nasungkit rin ni Aina Nicole Dela Cruz ang gold medal sa tanding girls at silver medal naman sa tungal girls category.

Gold medalist naman sa ganda boys sina Jasper Jay at Zandro Fred Jizmundo. Sa ganda girls ay gold medalist rin sina Aina Nicole at Ma. Christina Quiachon.

Ang iba pang medalya na nasungkit, mula sa tanding boys, bronze medalist din si Zandro, at silver medalist naman si Ma. Christina sa tanding girls.

Ang WVRAA ay opisyal na nagsimula Pebrero 4 at magtatagal sa Pebrero 11. Nilahukan ito ng mahigit tatlong libong estudyante kabilang na ang mga coaches at delegation officers mula sa Aklan, Antique, Capiz, Guimaras at Iloilo sa nasabing sports event.

Nabatid na may 15 sports event para sa elementary level at 21 naman para sa sekondarya. Maliban rito, mayroon ding paralympics para sa person with disabilities at tatlong demo sports.

MGA SUSPEK SA PAGLASLAS, PANANAKSAK SA ISANG COMPUTER SHOP, KINASUHAN NA

Ulat ni Darwin Tapayan at Archie Hilario, Energy FM 107.7 Kalibo

photo from CCTV photage

NEWS UPDATE: Bagaman menor de edad, habambuhay na pagkakabilanggo ang hinaharap ngayon ni alyas "Kiwit", 16-anyos, ng Brgy. Andagao, Kalibo.

Sinampahan na ito ng kasong murder araw ng Martes sa Aklan  prosecutor's office. Walang itinakdang piyansa sa kasong ito.

Matatandaan na sinaksak ni alyas Kiwit si  Earl Gabriel Perucho na isang  third year architect student ng  Aklan State University. Naisugod pa ito sa ospital pero binawian rin ng buhay habang sumasailalim sa operasyon. 

Frustrated murder naman ang isinampang kaso sa kasama nito na si alyas "Alas" na taga  Brgy. Andagao na suspek sa paglaslas sa leeg ng unang biktimang si Lester Radin ng Madalag. Nai-remit na ito sa Aklan Rehabilitation Center at may itinakdang piyansa para sa pansamantalang kalayaan na Php120,000.

Sa panayam ng Energy FM Kalibo, umamin si Kiwit na siyang sumaksak at nakapatay kay Earl at inamin din ni Alas na siya ang lumaslas sa leeg ni Lester. Trip-trip lang daw ng dalawa ang nangyari at wala raw atraso ang dalawang biktima sa kanila. 

Bumuhos naman ang simpatiya mula sa kamag-anak at kaibigan ng namatay na si Earl na ayon sa kanila ay isang "mabuting anak".

TINIGAW RIVERBANKS KABILANG NA SA OFFICIAL TOURISM DESTINATIONS NG AKLAN

ulat ni Darwin Tapayan, Energy FM 107.7 Kalibo

photo (c) SB Kimpo Jr.

Ibibilang na sa opisyal na mga tourism destinations ng Kalibo at lalawigan ng Aklan ang ‘picturesque riverside area’ ng Purok 3, Brgy. Tinigaw partikular ang mabuhanging bahagi ng riverbanks.

Sinang-ayunan ng mga miyembro ng Sanggunian ng Kalibo ang resolusyon para rito sa isinagawang fifth regular session. Sinasaad sa resolusyong ito ang kahilingang pormal na isama ang “Tinigaw Riverbanks” sa opisyal na listahan ng tourism destination ng Kalibo Tourism and Cultural Affairs Division (TCAD).

Hinihiling rin sa resolusyong ito ang pagsama sa listahan ng tourism destination ng Aklan Provincial Tourism Office (APTO) para sa paglalaan ng mga kaukulang suporta para sa mga posibleng tourism events dito.

Ayon sa may akda na SB Philip Kimpo Jr., mainam ito bilang racetrack sa motocross at bike competition, katunayan una na itong pinagdausan ng invitational cup Mayo noong 2016.

Maliban rito magagamit rin anya ang revetment wall sa paligid para sa jogging, biking park at iba pang mga aktibidad.

Pahayag pa ng lokal na mambabatas, ang nabanggit na lugar kapag na-ipromote ng mabuti at na-develop ay malaking tulong sa ekonomiya ng Kalibo at makakapagbigay ng mga hanapbuhay sa mas marami.

PAMAHALAANG LOKAL NG AKLAN, MANGUNGUTANG NG HALOS KALAHATING BILYON

ulat ni Darwin Tapayan, Energy FM 107.7 Kalibo

Balak ngayon ng pamahalaang lokal ng Aklan na mangutang ng halos kalahating bilyong piso sa banko para pondohan ang iba-ibang proyektong pang-imprastraktura at para ibili ng mga heavy equipments ng gobyerno.

Lunes ng hapon ay sumailalim na sa committee meeting ang kahilingan ni Gov. Florencio Miraflores sa ng Sangguniang Panlalawigan na magsagawa ng resolusyon kaugnay rito.

Ayon sa kahilingang ito, aabot ng Php445 milyon ang posibleng utangin ng pamahalaan mula sa Land Bank.

Kabilang sa popondohan ay ang pagsasaayos ng Aklan Training Center (30M) at Provincial Engineer’s Office (20M) at ABL sports complex (25M). Kasama rin dito ang konstruksyon ng Paseo De Aklan (10M), ekspansyon ng Provincial Assessor’s Office (8M) at ang pagbili ng mga heavy equipment (30M). 

Pinakamalaki sa planong uutangin ay para sa improvement ng Caticlan Jetty Port na may Php300 milyon. 

Samantala, kinuwestiyon naman ng mga miyembro ng Sanggunian ang planong konstruksyon ng Dep-Ed Division Office and Multi-Purpose building (phase 2) kung saan may hinihinging pondo na Php25 milyon. Iginiit ng ilang lokal na mambabatas na dapat sa pamahalaang nasyonal hingin ng mga opisyal ng Dep-Ed ang pondo para dito.

Dadaan pa sa mabusising pag-aaral at pagdinig ang panukalang ito.

AKLAN STATE UNIVERSITY, ISA SA TOP 10 UNIVERSITIES SA WESTERN VISAYAS

Pasok sa top 10 universities sa Western Visayas ang Aklan State Universities ayon kay Dr. Danilo Abayon, presidente ng nabanggit na unibersidad.

Ayon kay Abayon, ang listahan ay ginawa ng uniRank. Dati itong nakilala sa pangalang 4 International Colleges and Universities (4ICU).

Ang top five ay ang mga 1.) Central Philippine University; 2.) University of the Philippines-Visayas; 3.) John B. Lacson Maritime University; 4.) University of St. La Salle in Bacolod at ang 5.) West Visayas State University.

Ang iba pang unibersidad na pasok sa top 10 ay ang mga University of San Agustin; Iloilo Science and Technology University; University of Iloilo PHINMA: at ang St. Paul University-Iloilo.

Ayon sa uniRank, ang ranking ay base sa isang algorithm kabilang na ang limang unbiased at independent web matrix na kinuha mula sa apat na web intelligence sources. Ito ay ang mga Moz Domain Authority, ALexa Global Rank, SimractedilarWebGlobal Rank, Majestic Referring Domains at ang Majestic Trust Flow. – PNA 

20 ANYOS NA LALAKI MASWERTENG NAILIGTAS SA PAGBIGTI

ulat ni Darwin Tapayan, Energy FM 107.7 Kalibo

Isa na naman sanang buhay ang nasayang kung hindi agad naagapan ang pagpapakamatay ng isang 20 anyos na cargo forwarder Linggo ng hapon sa Brgy. Andagao, Kalibo.

Ayon sa biktima, nagbigti umano siya gamit ang sinturon sa kanilang bahay. Bago paman tuluyang bawian ng buhay mula sa pagkakasakal ay naabutan siya ng kanyang ama at iba pang miyembro ng pamilya na silang nag-alis sa kanya sa pagkakabigti.

Walang malay nang isugod sa provincial hospital ang nasabing lalaki at nai-confine rito para mabigyan ng kaukulang paggamot.

Hindi na binanggit ng binata ang dahilan ng kanyang tangkang pagpapakamatay at mariing itinatanggi na may problema silang magnobya. Paliwanag niya na trip lang ang kanyang ginawang pagbigti.

Matatandaan na nitong mga unang araw ng Pebrero, isang 17-anyos na dalaga ang nagbigti-patay sa Buruanga samantalang patay rin ang isang 36 anyos na mister makaraang magbigti rin sa kanilang bahay sa Brgy. Balabag, Boracay.

8 MONTHS OLD NA FETUS, NATAGPUAN SA BASURAHAN SA BORACAY

ulat ni Darwin Tapayan, Energy FM 107.7 Kalibo

Sariwa pa ng matagpuan ang isang tinatayang eight months old na fetus sa tambakan ng basura sa So. Tambisaan, Brgy. Manocmanoc, Boracay Lunes ng umaga.

Ayon kay PO2 Lenlyn Agapito ng Boracay Tourist Assistance Center (BTAC), una umano itong natagpuan ni Nanny Ilano nang ipagpag niya ang bed sheet na napulot doon. Dito nahulog ang isang lalaking fetus na wala ng buhay at nakabalot sa damit.

Pahayag pa ng imbestigador na nakuha umano ito mula sa garbage bag na nakolekta mula sa Brgy. Balabag.

Nakipag-ugnayan naman ang Material Recovery Facilities (MRF) supervisor na si Shallah Amacio sa mga opisyal ng barangay upang mabigyan ng desenteng libing ang nasabing fetus.

Matatandaan na Pebrero noong taon ay natagpuan rin ang isang bagong panganak na sanggol na itinapon kasama ng mga basura sa parehong lugar.

2 LALAKI NANAKSAK, NANGLASLAS SA COMPUTER SHOP

ulat ni Archie Hilario, Energy FM 107.7 Kalibo

Ang mga suspek habang nagbabantay sa likod ni Lester.
Kuha sa CCTV

Arestado ang dalawang lalaki matapos laslasan sa leeg ang unang biktima habang naglalaro sa loob ng computer shop sa Roxas Avenue Ext. Kalibo, Aklan. Kinilala ito sa pangalang Lester Radin y Nacubuan, 21 anyos, taga-Napnot, Madalag Aklan.

Base sa kuha CCTV ng computer shop, naglalaro itong si Lester nang lumapit ang dalawang suspek na armado raw ng kutsilyo saka nilaslasan sa leeg ang biktima.

Ang mga suspek ay kinilala sa pangalang Mark alias "Alas" at Randell Dave Borga alias "Kiwit". Si alias Alas umano ang naglaslas sa leeg ng biktimang si Lester.

Pagkatapos ang panglalaslas ay lumabas ng mga ito at sinaksak naman ang isa pang biktima na kinilalang si Earl Gabriel y Perucho, 19, taga-Union Nabas Aklan na napadaan lang sa lugar.

Isinugod ang dalawa sa ospital pero binawian rin ng buhay si Gabriel habang ginagamot.

Sa ngayon ay patuloy na ginagamot sa pribadong ospital ang mga biktima. Nakakukulong na ang mga naarestong suspek sa Kalibo, Municipal PNP Station.

MGA TURISTANG TSINO, NANGUNA SA ISLA NG BORACAY

Nanguna ang mga taga-Tsina sa mga turistang bumibisista sa Isla ng Boracay ngayong taon. Ito ay ayon sa report ng Caticlan Jetty Port mula Enero 1 hanggang 31.

Ang China ay nakapagrehestro ng 34,748 bilang, sinundan naman ng mga South Korea na may halos dikit na bilang sa 34,040. 

Ang iba pang mga top foreign arrivals ayon sa pagkakasunod ay Taiwan, Russia, USA, Australia, United Kingdom, Malaysia, Saudi Arabia, at Germany.

Nabatid na tumaas ng pitong bahagdan ang bilang ng mga turista ngayon kumpara sa nakaraang taon.

Sa buong Enero ngayong taon nakapagtala ang Caticlan Jetty Port ng 169,843 foreign at local tourist kumpara noong 2016 na may 158,701.

Sa mga nakalipas na taon, ang mga taga-South Korea ay palaging nangunguna sa mga turistang bumibisita sa Isla. Tinitingnang dahilan rito kung bakit naungusan ng mga taga-Tsina ang mga Koreano ay ang pagdiriwang nila ng Chinese New Year sa isla.

Inaasahan naman na mas lalu pang darami ang mga Tsinong bumibisita sa Boracay kasunod ng nakatakdang pagbubukas ng isang airline company sa Kalibo International Airport na may direktang ruta mula sa Fuzhou at Xiamen sa China.

MGA KAPULISAN ALL SET NA PARA SA ASEAN SUMMIT SA BORACAY

ulat ni Darwin Tapayan, Energy FM 107.7 Kalibo

“All set na.” Ito ang sinabi ni Aklan Provincial Police Office (APPO) public information officer SPO1 Nida Gregas kaugnay ng paghahanda ng mga kapulisan sa nalalapit na ASEAN Summit sa Isla ng Boracay.

Sa panayam ng Energy FM Kalibo, sinabi ni Greagas na nagsagawa na ng ocular inspection ang mga awtoridad sa mga pagdarausan ng mga pagpupulong sa isla, briefing, at dry run.

Ayon pa sa tagapagsalita ng APPO, anim na araw lamang ang itatagal ng summit sa isla. Ang mga pagpupulong ay gaganapin sa Pebrero 13 hanggang 15 at Pebrero 19 hanggang 21. Dadaluhan ito ng mga head of the state, minister, mga international and local media.

Magsisimula ang kanilang security deployment limang araw bago ang mga pagpupulong at limang araw pagkatapos.

Halos wala anyang pagkakaiba ang security system na ipapatupad nila kumpara sa APEC Summit sa isla ng Boracay noong 2015. Gayunman hindi kagaya ng APEC na may nasa 1,500 VIP, inaasahan anya na nasa 44 VIP lamang ang dadalo sa ASEAN kaya mas magaan lamang ito para sa kanila.

Tatlong task group ang binuo para mangasiwa sa peace and order, security, at emergency preparedness kaugnay rito.

Ayon kay Gregas, tinatayang nasa tatlo hanggang apat na libong force multipliers ang ipapakalat mula sa mainland Malay patungo sa mga lugar na pagdarausan ng pagpupulong sa Isla ng Boracay.

MGA KOREANO HINDI BINABAWALAN SA PILIPINAS – KOREAN CONSUL

ulat ni Darwin Tapayan, Energy FM 107.7 Kalibo

by Darwin Tapayan

Hindi ipinagbabawal ng consulate ang mga Koreano na bumisita sa Pilipinas sa kabila ng kontrobersiyal na pagpatay kay Jee-Ick Jo sa bansa.

Ito ang ipinahayag ni second secretary and consul ng Consulate of the Republic of Korea in Cebu Lee Yonsang sa isang panayam Miyerkules ng umaga.

Umaasa ito na mabigyan ng hustiya ang pagpatay kay Jo at hindi na ito masundan pa. 

Para sa kanya hanap parin ng mga turistang Koreano ang likas na kagandahan ng bansa. Naniniwala rin siya na ang mga Pilipino ay sadyang mapagkalinga sa mga bisita.

Si Yonsang ay nasa Aklan upang dumalo sa free-trial sa kaso ng pagkamatay ng isang Koreanong negosyante sa Isla ng Boracay noong Agusto 2015 dahil umano sa kapabayaan ng helmet diving company na pinagrentahan nito.

Samantala, napag-alaman na noong 2016, apat na mga Koreano ang napatay sa aksidente sa Boracay.

Ang Koreano ay nangunguna sa bilang ng mga turistang dumarayo sa Boracay at maging sa buong bansa.