Anomaliya sa konstruksiyon ng Makato Public Market pinaiimbestigahan ng Sangguniang Bayan sa COA

PINAIIMBESTIGAHAN NG Sangguniang Bayan ng Makato sa Commission on Audit ang hindi natapos na konstruksyon ng harapan ng kanilang pamilihang bayan.

Nabatid na naglaan ng Php5,000,000.00 pondo ang pamahalaang lokal ng Makato para sa phase 1 ng rehabilitasyon ng pamilihan. Mula ito sa 20 porsyento ng kanilang development fund.

Nagsimula ang konstruksyon Hunyo 2018 at inasahang matapos sa Oktobre ng parehong taon. Kinontrata nila ang Audric Construction and Supply para sa nasabing proyekto.

Ayon kay Bob Augusto Legaspi, bise alkalde, sapat umano ang pondong inilaan ng pamahalaang lokal para sa naturang proyekto kaya ipinagtataka niya kung bakit hindi parin ito natatapos.

Aniya, mga tauhan pa ng munisipyo ang nagligpit ng mga nakatiwangwang na materyal na ginamit sa konstruksyon matapos aniyang pabayaan ng kontraktor.

Sinabi pa niya na humihingi muli ng panibagong budget si Mayor Abencio Torres sa pamamagitan ng Sanggunian pero hindi umano nila ito inaprubahan.

Nais muna umano nilang paimbestigahan ang nasabing anomaliya sa COA.

Sa kabilang banda, naniniwala si Mayor Abencio Torres na politika ang nasa likod ng pagtanggi ng Sanggunian sa kanyang hiling na dagdag budget para sa kontruksyon ng public market.##

PENRO TALABERO PINAGSOSORRY SA TAUMBAYAN NI MAKATO VICE MAYOR LEGASPI

PINAG-SOSORRY NGAYON ni Makato Vice Mayor Bob Legaspi si Provincial Environment and Natural Resources Officer - Aklan Valentin Talabero sa taumbayan.

Kasunod umano ito ng binitawang pahayag ni Talabero sa isang radio station na "politicking science" ang nasa likod ng pagpapasara ng Sangguniang Bayan sa tambakan ng basura sa kanilang bayan.

Ito ang hiniling ng bise alkalde at iba pang miyembro ng Sanggunian sa PENRO sa technical conference ng Environmental Management Bureau hinggil sa pagpapasara ng tambakan ng basura.

Nanindigan si Vice Mayor Legaspi na walang pamumulitika sa likod ng nasabing resolusyon na ipinasa nila na nagrerekomenda na isara ang tambakan ng basura sa Brgy. Cabatanga.

Ayon kay Legaspi ang kanilang aksiyon ay base umano sa kanyang personal na obserbasyon sa lugar na aniya ay hindi sumusunod sa mga environmental laws.

Binanggit rin ng opisyal na maaaring makasuhan administratibo ang PENRO dahil sa malisyoso niyang pananalita.

Nabatid na hindi pa nakakabisita sa lugar si Talabero. Humingi naman ito ng "sorry" sa Sangguniang Bayan sa nasabing conference pero nais ni Legaspi na mag public apology ito on air.##

- Kasimanwang Darwin Tapayan, Energy Fm 107.7 Kalibo

MAKATO NAMOMOROBLEMA KUNG SAAN ITATAPON ANG KANILANG MGA BASURA

PROBLEMA NGAYON sa Makato kung saan dadalhin ang mga basurang nakokolekta sa kanilang munisipyo at sa pamilihang bayan.

Ipinasara kasi ng Sangguniang Barangay ang Sanitary Landfill sa Cabatanga sa nasabing bayan sa bisa ng isang resolusyon.

Ayon sa konseho ng Cabatanga, ang hakbang na ito ay base rin sa resolusyong ipinasa ng Sangguniang Bayan sa pangunguna ni Vice Mayor Bob Legaspi.

Isinaad sa kanilang Barangay Resolution 2018-09 na ang sanitary land fill ay isa umanong dump site at iligal ito. Wala umanong proper segragation ng basura.

Iginiit rin sa resolusyon na walang kaukulang Environmental Compliance Certificate ang nasabing land fill.

Agosto 16 nang magpasa ang SB Makato ng Resolution 2018-72 na nagrerekomenda sa alkalde na ipasara ang sanitary landfill dahil sa paglabag sa mga batas.

Hindi inaprubahan ni Mayor Abencio Torres ang resolusyon dahil halos mag-iisang buwan na umano bago natanggap ng kanyang opisina ang kopya ng resolusyon.

Sa kanyang sulat-tugon sa SB sinabi niya ang pangamba sa posibleng pagdami ng basura sa kanilang bayan kasunod ng pagsasarang ito.

Aniya, dapat ay gamitin muna ang nasabing land fill habang naghahap pa ng panibagong lupa para sa mga basura. Idinulog na ng alkalde ang usapin sa Department of Environment and Natural Resources.##

- Darwin Tapayan, Energy FM Kalibo