Provincial Health Office sa Akean nagapanawagan magpabakuna kontra tipdas

akoaypilipino.eu

NAGAPANAWAGAN MAKARON ro Provincial Health Office (PHO) sa Akean sa mga pumueoyo nga magpabakuna kontra tipdas.

Kasunod raya it outbreak it nasambit nga masakit nga nairekord sa pila ka mga rehiyon sa bilog nga Pilipinas. Bisan owa naiba ro Western Visayas sa outbreak kinahangean gihapon sigon nga magtagam ro mga pumueyo.

Umpisa Enero 1 hasta Pebrero 3 sa rayang dag-on nakarekord ro Aklan Provincial Epidemiology Surveillance and Response Unit it sangka kaso manubo raya it 88 porsyento kumpara ku 2018 nga may siyam.

Sa bilog nga dag-on 2018 nairekord ro 50 ka kaso nga may tatlo nga nagpositibo. Manubo ra it 68 porsyento kumpara ku 2017 nga may 157 kaso nga may sambilog nga nagpositibo.

Sa 157 kaso ku 2017 eakip kara ro mga kaso it German measle nga nasayuran naagihan it mga staff sa Gaisano Mall.

Angot kara nagapanawagan si Dr. Vic Santamaria, opisyal it PHO, sa mga pumueyo nga magpabakuna. Libre sigon ra sa mga rural health center sa mga banwa. May mass vaccination man sa mga eskwelahan sa Grade 1 ag Grade 7.

Aminado si Dr. Santamaria nga nagnubo it haeos katunga ro mga nagpabakuna para sa tipdas ku nagtaliwan nga dag-on. Posible suno kana nga kasunod man raya it kontrobersyal nga Dengvaxia vaccine para sa dengue.

Ginklaro na nga ro bakuna sa tipdas nga ginagamit it gobyerno hay euwas ag wa it dapat nga kabaeak-an. Daya sigon ro ginagamit man sa bilog nga kalibutan.##

- Kasimanwang Darwin Tapayan, Energy FM Kalibo