LIBACAO, AKLAN-Isaeang ka hinun-anon ro ginpatigayon ni Mayor Charito I. Navarosa sa Opisina it Sangguniang Bayan sa tunga it pamilya Katimpo ag Idala nga taga Barangay Oyang Libacao, Aklan.
Nag-umpisa ro sigaeot o indi pagkaeasugot it daywang ka pamilya pagkatapos nga ro pamilya Idala hay nagreklamo bangud nga ginapugngan sanda it pamilya Katimpo nga padayon nga umahon ro eugta nga suno kanda hay andang pinanubli sa andang ginikanan.
Ginahambae ni Bonifacio Idala, Jr. nga imaw hay may eanas nga mga saysenta gantas ag mga daywang pasong nga taeamnan it eanot (abaca) sa nasambit nga propyedad ag daya suno kana hay pinanubli na man sa anang ginikanan, ugaling eamang hay owa imaw it ikapakita nga deklarasyon o titulo it eugta.
Ginpakita man ni Larry Katimpo ro deklarasyon it eugta may Numero 05-020-0139 sa ngaean ni Ogda Katimpo nga anang lolo, ag suno kana hay nakasakop sa eugta nga gina uma ni Bonifacio Idala, Jr.
Sa nasambit nga hinun-anon, naghilisugot ro daywang ka pamilya sa gin-hueong ni Kapitan Guillermo O. Colas, Jr., IP Mandatory Representative nga adtunan nana sa Huwebes, Pebrero 21 kaibahan sanday Kapitan Aurelio Idala ag Tribal Leader Arnie Dolinog ro nasambit nga lugar agud usisaon ro mga dueunan it eugta agud masayran kun nakasueud gidman sa rayang lote ro gintamnan ag ginkultibar it pamilya Idala.
Mientras owa pa it resulta, naghilisugot ro daywang ka partido nga padayunon ro normal nga pagsinaeayo, ag matapos ro pag-usisa hay mapatawag uman it hinun-anon kanda.
Ro hinun-anon hay gintambungan man it Libacao Police ag mga kapamilya ko Idala ag Katimpo./ Rey Orbista, SB Secretary
No comments:
Post a Comment